摩佬發火非同小可

熱刺領隊「摩佬」摩連奴禮拜四火山爆發！喺IG上載張坐喺隊巴嘅相，戴住口罩齋望對眼，都已經令人不寒而慄；佢仲加多句圖說：「打成咁，抵輸！希望巴士上所有人心情都好似我咁差！聽朝11點，練波！」班球員睇到呢個post，肯定驚到騰騰震。

摩佬上社交網站發火，其實係有跡可尋。上場聯賽1比0小勝般尼，佢上載張更衣室球員各自篤手機嘅相，寫道：「世界變啦！贏完波嘅更衣室係咁嘅！」擺到明不滿球員毫無團隊精神，贏波都只係各自玩手機，真係唔係幾似樣。

蛛絲馬跡往往反映球隊心態，熱刺周三歐霸盃0比1不敵安特衞普，摩佬派大量後備上陣，包括迪利阿里、盧施素、貝雲積等，結果半場就換走咗4個正選，「我直頭想全隊換晒添！唔係驚住下半場有突發事件，一早用盡5個換人名額。」

摩佬最不滿當然係迪利阿里，今次特登畀機會佢打，結果又踢到不知所謂。「之前唔畀一啲球員踢，外界鬧到我飛起，你睇，到我用佢又交唔交到貨呢？」摩佬賽後呻道。不過，迪利阿里冇踢咁耐，又真係好難一下子交足貨。

教練要與時並進

摩佬把口向來厲害，既然將責任推畀球員，自然要踩多兩腳。「要怪就怪一個人啦！咁係我決定邊個打正選㗎嘛！既然責任喺我度，將來選人就簡單得多，球員嘅表現大家有眼睇，大家嚟緊幾個禮拜唔會質疑我嘞啩！」

聽落又有啲道理。不過，阿仙奴名宿基昂唔係咁睇，「喺社交網站批評球員，呢種做法我唔係幾贊成！好多嘢留番更衣室講嘛！可能我out咗啦！不過，咁做球員真係會打番好咩？如果係嘅話，又唔該三口六面講清楚。」

做教練都要與時並進嘅！班球員都習慣用社交網站交流，摩佬投其所好都好合理。何況透過社交網站一張相幾個字，球員睇到可以有唔同感受，有則改之、無則加勉，好似費Sir咁大開吹風機，搞到更衣室氣氛緊張，唔一定啱呢個時代。

熱刺本輪聯賽將主場對白禮頓，摩佬近5場聯賽不敗，對手就4場聯賽未贏過，相信下場波賽後佢會換過個面口，同班球員有講有笑囉！

下一篇：	周四主要足球賽果及主要足球賽程
上一篇：	魔兵殘局曙光初露

文章：

摩佬發火 非同小可