2020年9月16日
PSG(巴黎聖日耳門)球星尼馬周日聯賽做咗紅牌阿姑,佢混亂中打馬賽後衞艾華路蘇比朗嘅後尾枕,好可能加罰停賽7場。呢位巴西球員條氣唔順,喺社交網站出文批評對方種族歧視,仲話好後悔冇當場出重手教訓!
尼馬自稱係黑人後代,並且以此為榮,「佢以歧視黑人嘅粗口鬧我!……我哋要制止種族歧視!」尼馬寫道。不過,艾華路蘇比朗亦上載同黑人隊友嘅合照:「歧視冇碇企!我哋亦要學習認輸,唔應該拖歧視落水。」
咁就真係口同鼻拗啦!負責直播嘅電視台Téléfoot睇番畫面,暫時仲未發現艾華路蘇比朗涉及種族歧視,只係捕捉到尼馬個嘴型:「你係咪種族歧視我?!」希望當局翻查過更多畫面,盡快還原事件嘅真相。
呢單衝突事件,達聞西覺得兩邊都好有問題。艾華路蘇比朗更加有前科添,佢2016年効力愛斯賓奴嗰陣,曾經以手勢嘲諷美斯係「矮仔」,事後透露同美斯嘈足全場,「佢笑我踢得屎,我咪笑番佢三寸丁囉!」
球場事球場了
飲酒、打麻將見人品,落場踢波都一樣。艾華路蘇比朗係陰濕型,會踢你一腳或者用粗口挑釁,你火遮眼一犯規領紅牌,佢就達到目的!艾華路蘇比朗令到3名PSG球員出場,你話佢蠢定精啦?不過佢另一特點係敢做就敢認!
「佢係個白癡!但我白癡到中佢嘅圈套,又冇打到佢口腫面腫!」尼馬咁講即係鼓吹暴力,認真唔要得啊!其實,佢呢種戲弄對手嘅踢法,加上郁啲就「碌地沙」博對方食牌嘅做法,同樣係好鬼死乞人憎㗎!
達聞西睇咗好多次事發短片,艾華路蘇比朗出口術固然衰,但尼馬扮摸頭同對方和解,實質大力拍鬼佢後尾枕,可以講係半斤八兩,大家打個和算數啦!正所謂球場事球場了,有咩等下次碰頭再計啦!
仲記得2012年,土耳其前國腳安利曾經辱罵黑人球員索高拿,幾個月後重逢被對方同隊友惡意犯規,搞到全場碌嚟碌去,隔住個mon睇都覺得痛。最弊係安利又死性不改,兩年後成為首位因種族歧視判入獄嘅球員,好彩判緩刑兩個半月。
所以話,艾華路蘇比朗同尼馬都要汲取教訓,落場就正正經經踢波、光明正大比高低;大丈夫一人做事一人當,千企唔好攞人哋父母、膚色、宗教嚟講啊!
放大圖片 / 顯示原圖
訂戶登入
下一篇: | 周一主要足球賽果及主要足球賽程 |
上一篇: | 教練就是要放下自我 |