《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2020年8月6日
2020年真係多災多難，日前黎巴嫩首都貝魯特港口大爆炸，半空升起一朵蘑菇雲，滿地殘骸，簡直人間地獄。暫時未知係化學品意外着火，定係有計劃嘅恐怖襲擊，總之無辜百姓最慘係啦！
各國傳媒搶做網上直播同做現場訪問，一位叫丹尼爾嘅西班牙足球教練突然間做咗網紅。呢位仁兄4年前到貝魯特搵食，開咗間足球學校外，仲響勁旅阿赫德做助教，舊年獲亞協盃冠軍，真巴閉！
啱啱上個禮拜仲升做教練，禮拜二第一次帶隊操練，剛啱收操就傳來巨響，係咪球迷放炮仗慶祝吖？丹尼爾耳仔嗡嗡聲，成個人震晒，冇耐就畀巨型灰層包圍，四周傳來玻璃爆裂聲同尖叫聲。
丹尼爾抱住個頭趴地，等周圍平靜落嚟，望得清環境先起身，真係險過剃頭啊！跟住就即刻上車番屋企睇家人，「我着住對波砵開車走，一手揸軚盤一手護住塊面，以防又有爆炸畀玻璃割傷。」
距事發地八公里
達聞西特登用Google Earth度距離，阿赫德訓練基地距離爆炸地點成8公里，可見爆炸威力有幾大！丹尼爾番到屋企唔見家人，嚇到死死下係咁搵，最後喺儲物室見到家人齊齊整整，總算鬆番口氣。
丹尼爾太太面青口唇白咁講：「嗰下巨響真係嚇死人！仲以為係炸彈爆炸。」更得人驚係，佢屋企距離港口有成20公里，離咁遠啲爆炸聲都咁大，唔怪得有人攞嚟同廣島原子彈爆炸相比。
唔知丹尼爾去貝魯特之前，有冇了解過當地政局呢？黎巴嫩近半世紀又內戰又革命，佢効力嘅阿赫德係親什葉派組織真主黨，呢個組織被以色列等西方國家定性為恐怖組織，仲幫敍利亞獨裁者阿薩德打內戰添。
記得，前阿赫德球員山卡4年前為真主黨上陣，不幸喺阿勒頗戰役喪生，秘書長阿斯當正佢英雄：「佢將寫入球會嘅歷史，佢唔單止為球隊効勞，仲為保衞國土而犧牲！」所以齋踢波唔理政治，有時都幾危險。
「閒事莫理，眾地（音碇）莫企」，做人要遠離危地；當然，最緊要都係世界和平，唔係處處係危牆，根本避無可避。係囉！
有咩坐低飲啖茶食個包，唔掂傾到掂，唔使郁下就玩子彈嘅！
放大圖片 / 顯示原圖
訂戶登入
