睇住你大睇住你壞

做人，食幾多，着幾多，整定嘅！唔使太在意成敗得失，一時得，到頭嚟可能得個桔！《桃花扇》有寫：「眼看他起朱樓，眼看他宴賓客，眼看他樓塌了。」恭喜DSE放榜成績理想嘅同學，唔理想嘅都唔使灰心，人生馬拉松仲好長！

達聞西睇住曼城領隊哥迪奧拿出道，可以叫佢一聲哥仔，剛出道怕怕羞羞，最頑皮都係整蠱下隊友，或者背住隊長巴格路同阿嫂跳舞，呢段熱辣跳舞片畀巴格路個女擺咗上網，如果20年前睇到嘅話，輕則打場交，重則婚變都似。

哥仔教波一流，可以同高普、普捷天奴並列三大少帥，不過最近嘅言論有啲走火入魔，好似要求鬧曼城做假數嘅人道歉，甚至連執教老友阿迪達執教嘅阿仙奴都唔畀面，「球場內，我尊重佢哋，球場外？不啦！」

阿仙奴做咗咩衰嘢呢？原來，不過係聯同8支英超前列球隊致信歐洲足協重罰曼城，話曼城贊助合約篤數買球員，對其他球隊好唔公平！就係咁，就得唔到哥仔尊重啊？係咪要阿仙奴一齊篤數，先係值得尊敬嘅球隊？

走法律罅

喂！個世界唔應該係咁啊？違反條例走法律罅，逃過禁賽罰款1000萬，就當自己清白無瑕，理直氣壯指住投訴者嚟鬧，呢個世界仲有天理嘅？達聞西睇到單新聞，真係要講一句：哥哥仔，真係睇住你大，睇住你壞啊！

過去，好多人批評哥仔冇料到，帶領巴塞橫掃歐聯，靠嘅係阿根廷球王美斯；後來去教拜仁慕尼黑，又係靠燒錢買球星稱霸國內，但打歐聯就始終唔掂！唓！阿豬阿狗帶拜仁都贏德甲啦，哥仔有幾把炮啊？

之後教曼城又係大肆擴軍，強到正選後備都分唔清，雖然話贏到兩季英超聯，但歐聯始終四強都入唔到。今季就連英超冠軍都輸埋畀利物浦，而且積分差距達15分之多，對於億萬大軍嘅曼城嚟講，認真失威啊！

輸波唔輸品，達聞西勸哥仔適可而止，唔好再將黑講成白，變咗摩連奴咁犯眾憎，就唔係幾過癮啦！人生流流長，條路鬼咁窄，做壞個招牌，第日點教豪門？唔好起好座朱樓，跟手自己推冧佢啊！

下一篇：	白頭摩羅
上一篇：	一次降班足以致命

文章：

睇住你大 睇住你壞