泰臣復出武僧挑機

美國前重量級拳王泰臣，不日將正式重返拳壇，全球武林將掀起挑機熱潮，好似前拳王荷里菲特、前綜合格鬥王艾洛夫斯基等等。泰臣就話明唔同賽事都無任歡迎，一於寓操練於娛樂，同時都做下善事，一舉幾得啊！

呢位53歲拳王係真復出，已經展開地獄式訓練，唔似得內地武林中人咁，靠個響亮外號招搖撞騙，一上台就畀對手秒殺。有樣嘢大家都唔明，好似之前30秒被K.O.嘅「渾元形意太極拳掌門人」馬保國，點解69歲人都搵命搏呢？

吉林散打主席鄭環宇日前踢爆，原來馬保國出場費高達20萬人仔！佢本身其實唔識功夫，純粹睇錢份上先拳腳相向。呢類拳賽真係唔人道，畀個近70歲嘅老翁上去打？佢肯啊！主辦方都唔應該受，對手更唔應該拳拳攞命。

中美大戰

內地冇真功夫有真搲銀，咁就難怪泰臣一話想復出，「少林武僧」一龍就下戰書，話要同呢位美國拳王決一勝負！呢個一龍當然唔係真少林弟子啦！之前靠搵假拳手嚟打一度走紅，幾年前被泰國拳手擊倒後就低調做人。

話說泰臣已經收到2000萬美元報價，對手收個零頭都有幾百萬人仔，呢個人肉沙包做得過！不過，一龍數口精，其他內地武林中人都唔蠢！「武術大師」何道君、「氣功大師」謝水平3年前已經提出挑戰泰臣，一龍快啲搵下龍尾喺邊啦！

講到挑機泰臣嘅中國第一人，就係外號「宇宙最強」嘅港產武打明星甄子丹，佢5年前拍《葉問3》就同對方打咗幾十秒，按劇本要求最後未分高下。不過，當年泰臣因破產等錢使，先勉強為錢拍呢啲片，現時就今時唔同往日啦！

自從2018年加州大麻合法化後，泰臣同英國商人合作做咗大麻大亨，成個大麻田有成16公頃，真係數錢都要專人嚟數！既然得閒嘞，咪操番拳重出江湖囉！咁啱近年武林冇咩生氣，所以大家都好歡迎泰臣出山。

武林中人真係要學泰臣，操好副身體先好出場，唔可以為錢連命都唔顧，最弊係破壞咗成個武林生態，下一代武林人士仲點搵食呢？做人做事要留有餘地，唔可以拍拍個腦袋就去馬啊！

下一篇：	意軍奪電競歐國盃
上一篇：	周日主要足球賽果及主要足球賽程

文章：

泰臣復出 武僧挑機