黑獄細哨哥

球迷們，「細哨」出冊啦！中國武漢周三凌晨開城，呢位巴西球王亦喺周二晚離開監獄，同哥哥阿斯斯入住Palmaroga酒店繼續軟禁，保釋金130萬鎊。檢查官警告兩兄弟，保釋期間唔可以亂講嘢！

達聞西都替呢對落難兄弟開心，起碼唔需要再同150個重犯共處，一人一間酒店房，乾乾淨淨舒舒服服，慢慢等待公義嘅降臨。呢壇假護照風波，達聞西愈睇得多資料愈覺得好可疑，希望細哨可以盡快脫苦海。

首先，前巴拉圭門將「老虎狗」芝拉華特，一向特立獨行兼敢言，佢就喺社交網站炮轟內政部部長艾斯維度：「部長先生！外國人朗拿甸奴入獄，但主犯盧比絲逍遙快活！你口口聲聲話仗義執法，點解偏袒自己朋友啊？」

哦！原來安排細哨兩兄弟來巴拉圭嘅女富豪，竟然同主宰呢單case嘅艾斯維度係朋友關係？唔怪得到今日都拉唔到盧比絲啦！巴拉圭總統貝尼特斯就話全力支持內政部同艾斯維度，不過，佢又被人踢爆同盧比絲有過一面之緣！

盧比絲嘅天使博愛慈善基金會九年有活動，貝尼特斯竟然出現喺現場仲一起握手添！貝尼特斯當然即可割席啦！「我同盧比絲三唔識七，當日係佢突然出現先相遇。而且，基金會嘅宣傳片內容，我根本就唔知！」

堂堂總統會懵查查出席活動，可以立亂同人握手？而且，盧比絲之前洗錢罪，一直由公共部門調查同起訴，呢次捲入細哨假護照案，卻突然由內政部指揮調查，連反貪部門都唔准介入！難怪，芝拉華特都質疑艾斯維度啦！

反貪部無法介入

呢位盧比絲絕對唔係簡單人物，佢另一間公司Permanent Oriental Holding S.A.，竟然係政府部門公認嘅供應商，業務範圍包括票務、傢俬、文具、電腦軟件、教育、印刷、公關……同政府有咁千絲萬縷關係，貝尼特斯同艾斯維度認真要秉公辦理啊！

好彩，細哨係國際知名球星，唔係一個普通嘅巴西遊客，相信巴拉圭政府點都唔敢隻手遮天啩！

下一篇：	愛的剃頭
上一篇：	足球壇確診人士表

文章：