《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2020年3月28日
新型冠狀病毒爆發以來，港人防疫功夫做到加零一，香港城邦論作者陳雲唔係幾睇得過眼，喺臉書冷潮熱諷港人亂戴口罩、唔敢出街，嚇走投資者聽經濟衰退云云。其實，全球經濟都受疫情影響，香港扮若無其事，唔通就唔受拖累咩？
呢個世界唔可以扮鴕鳥嘅！眯埋對眼：「你睇我唔到！」就可以逢凶化吉咩？記得陳雲老早推出抗疫神器，可能香港人唔buy銷路差，於是攞口罩嚟發爛渣啦！其實，呢個疫情真唔講得笑，達聞西就同大家講下兩位感染者嘅遭遇。
香港空手道代表李振豪，講過同隊友喺法國去過超市同餐廳，就咁搞到前後三名隊員確診。運動員身體強壯，入院9日康復得七七八八，連喉嚨都唔痛，但病毒測試依然係陽性！佢試過練返體能，結果發現仲差過普通人，10分鐘見攰兼氣喘！
達聞西特別關心運動員嘅情況，因為呢個病毒傷害最大係肺部，唔好話去到纖維化咁嚴重，肺功能多多少少都受損。呢班準備參加奧運或職業球員，就算康復，肺功能又剩返幾多？
豪B嘆體能差
阿仙奴領隊阿迪達叫做康復咗，但佢講番之前隔離同治療段日子，依然係猶有餘悸！佢話知道確診後，即刻揀一間房同浴室自我隔離，結果第二日太太就出現喉嚨痛等病徵，嚇到佢死死下！最弊係佢仲有3名仔女同住，萬一感染到點算！
「謝天謝地！細路冇感染，如今全家平安。所以，一旦感染已經太遲，等到去做病毒測試，身邊人隨時已經受到傳染。我勸大家盡量留喺屋企，避免任何被傳染嘅機會，大家一定要記住。」阿迪達好語重心長咁講。
阿迪達講得好啱，個病毒最可怕係可以毫無病徵，就算有都係普通感冒咁樣，結果就傳染咗畀人都唔知。香港人並唔係亂戴口罩，而係唔肯定自己係咪受感染下，唔希望傳咗畀其他人！喺冇藥物同疫苗下，當然要打醒十二分精神啦！
所以話呢，班城邦信徒們唔使咁牙擦擦嘅，我哋亦唔介意畀人笑㗎，睇下新加坡、歐美各國咩情況就知啦！亂世的確容易發大財，但入錯貨招致損失呢？就要檢討下自己商業眼光，而唔係怨全世界都唔識貨！
放大圖片 / 顯示原圖
訂戶登入
