熱門:

2020年2月28日

達聞西 競技研究院

黑客入侵 曼城失守

一個政府失信於民,做乜都唔會有人信,派個錢都覺得你有景轟,有不可告人嘅目的,呢個就叫「塔西佗陷阱」。曼城近年透過金權交易迅速崛起,亦令佢哋失信於球壇,連前IT部門員工都出蠱惑喺背後插一刀。

呢位二五仔向放蛇嘅英國小報記者爆料,話用自己手機可以入到領隊哥迪奧拿嘅個人郵箱,睇到晒所有聯絡人嘅資料,包括電郵地址、電話、郵件內容等,仲當場cap張圖片做證添!最後提出記者畀10萬英鎊,佢就畀晒啲資料對方。

「黑入哥迪奧拿郵箱,簡直易過借火。」呢位二五仔所屬嘅IT公司,2016年起為曼城提供網上保安服務,兩年合約到期後分道揚鑣。佢就趁呢個機會入到哥帥嘅個人郵箱,睇晒旗下球員啲人工,仲有斟馬菲斯迪歷特嘅電郵往來。

呢位IT人欠缺職業操守,但哥帥本身位高權重,明明知道郵箱有咁多敏感資料,竟然毫無保護私隱嘅觀念,都要負番部分責任。二五仔仲話哥帥個郵箱同手機互綁,手機有咩新聯絡人資料,佢都知道得一清二楚。

不過,呢件事都有正面嘅意義,就係證明哥帥私生活檢點,試諗如果佢有桃色醜聞,放蛇嘅小報記者仲唔幾歹煲大佢咩?多多錢都肯畀,球員人工、轉會談判呢啲料,既然幫唔到小報賣紙,呢10萬鎊當然擺返落銀包啦!

人贓並獲

二五仔遇上狗仔隊,結局係IT仔慘敗!放蛇記者訪問完兼偷影埋相,就聯絡曼城公關部兼提供埋證據,會方即刻通知大曼徹斯特差舘,英國警察有頂皇冠係唔同啲,馬上破門入屋拉人,當場查手機、電腦等資料。

英國警方唔會濫捕同濫告嘅,疑犯落完口供暫時獲釋,但將繼續接受調查,一旦搵夠料將正式起訴,呢位黑客洗乾淨個八月十五啦!試問,負責網上保安嘅IT人竟然偷客戶資料,等同執法人員知法犯法,簡直係全行嘅公敵!

哥帥郵箱被hack好無癮,但係曼城歐聯十六強作客皇家馬德里就反勝2比1,最緊要係有兩個作客入波喺手,次回合返主場晉級機會好高。頭頭碰着黑嘅2020年,總算有件值得開心嘅事啦。

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads