熱門:

2017年10月11日

陳心遙 視線所及

曾經Dem Cheers嘅你

又一個只發生在互聯網年代嘅事件。有人將7年前嘅港大舍堂Dem Cheers拎出嚟取笑,一樣本來存在已久嘅大學次文化,俾Facebook同YouTube公諸於世。喺我讀中學同大學嘅年代,港大舍堂文化有一種濃厚嘅神秘感,諸如玩新生玩得好黐線,圍內歸屬感超強等等,通通都係傳說嚟,係聽師兄同埋同學口耳相傳。到咗呢個乜都放晒上網嘅年代,咩神秘感都冇晒。

話說呢班女仔應該全部畢晒業,已經喺香港社會上唔同崗位工作緊。啲留言話佢哋今時今日睇番會唔會好後悔,當年好認真做咗件X事云云。

據我所知,即使係宿舍凝聚力稍遜嘅中大,宿生都會對幾年嘅群體生活念念不忘,不論當時所做嘅事有幾儍、幾無聊。大學就係大學,一個既崇尚自由又重視社群團結嘅地方,一個你出咗嚟做嘢,就冇得返去,只可以懷念嘅地方。

一間正常嘅大學,如果冇傳媒同社會嘅干擾,理應就係一個反叛嘅地方,呢度人人都有權講自己主張,亦有權反駁人哋嘅主張,唯一唔可以嘅就係唔准人哋講嘢,正所謂「我反對你嘅諗法,但我誓死捍衞你表達你諗法嘅權利。」只要冇傷害別人,就冇嘢係唔討論得:化學會講毒品嘅成分同原理、物理會質疑宗教嘅教義、社會學會討論賣淫嘅存在價值、人類學會講亂倫對族群嘅影響。教人做金融同做生意都係有,但只屬於綜合大學世界嘅一小部分。

就係每個人嘅學識同思想都唔同,大學俾一個地方自由交流,探求真理,研究出路,無論你嘅政治取向、價值取向或性取向幾咁特殊,你點都搵到一個半個氣味相投嘅人,陪你喺思想嘅曠野上流浪落去。

就算冇咁學術;大學對於好多同學,就係一段曾經可以集體做蠢事、玩低俗O'Camp遊戲、玩Dem Cheers、一班人無所事事坐喺空地食糖水傾偈傾天光嘅日子。呢段輕狂歲月,呢種浪漫體驗,呢場無憂無慮嘅青春,已經靜靜地封存咗喺記憶入面。當出咗嚟做嘢,返工迫巴士迫港鐵,Office俾客戶同老闆埋怨,OT做到十一二點,一個人走在燈火闌珊嘅街道上嘅時候,呢啲畫面同聲音就會走番出嚟提醒你,你曾經都有不理世俗嘅行為,你臉上都曾經掛住不經修飾嘅笑容。你開會時候虛應同事上司嘅笑聲,一定唔會有玩完Dem Cheers攬住同學彈吓跳吓嗰一份簡單同真摯。

如果你真係有為當時Dem Cheers嗌過嘅幼稚歌詞、做過嘅古怪動作而面紅;記住,錯都係錯在而家太方便嘅手機同網絡,而不在你天真可愛嘅青春。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads