熱門:

2017年8月21日

蘭詩 視線所及

有depression簽嘅合同會無效?

參加律師會舉辦的台北cooking tour,成功學會弄小籠包、煎蠔餅、涼拌青瓜等台灣特色小吃。回到香港當然要實踐一次。請來「春小姐」等三五知己到家一嘗我平生第一次煮的台灣住家菜。

席間「春小姐」說:「女神,我前夫最近話自己患咗憂鬱症,好內疚當年為狐狸精拋妻棄女,而家想將間祖屋轉名畀個女當小小補償。不過佢而家有心理病,簽合同有無效?」

我答:「普通法假定任何人都有精神能力去構成有約束力嘅合同。所以如果有人要challenge,舉證責任喺佢身上;佢要有證據證明你前夫簽文件時精神上係無足夠嘅行為能力。如果被證實簽名時精神上無行為能力,咁有關文件就真係會無效㗎。

「要判斷一個人精神上有無行為能力,視乎佢當時係咪明白有關事件或決定嘅性質同後果。

「至於佢需要明白到乜嘢程度,就要視乎係乜嘢事。一般嚟講,如果交易只係普通財產買賣,要求精神上嘅行為能力唔會好似立遺囑要求咁高。

「不過,如果涉及佢將自己啲資產送贈畀其他人,要求佢明白嘅程度,會就資產佔佢全部資產幾多而增高。

「要判定一個人係咪有足夠能力明白有關交易嘅性質同後果,法庭可考慮各種因素,包括佢嘅精神病紀錄、精神科醫生對佢嘅診斷同意見、佢係咪大致知道佢總資產同有關送贈或交易嘅比例、送贈嘅後果、有關合約中嘅重要條款、當事人平時係咪自己有足夠能力處理自己嘅資產同日常事務等。

「其實有唔少呢方面嘅cases。例如喺『Probus Ltd v Treble & Triple Ltd』一案,法庭裁定一名被指患有老人癡呆嘅80歲老人有足夠嘅精神行為能力。法官指出佢係接受精神科醫生診察時可自由轉換語言(國語、廣東話、福建話),他亦可就買賣物業嘅開放式問題作出連貫嘅回應,因此法庭裁定雖然當事人患老人癡呆症,合約仍然有效。

「另外,喺『Treasure Spot Finance Co Ltd v Li Chik Ming & Another』一案,法庭裁定一名被指患有思覺失調症/精神分裂症嘅男子簽署嘅合約仍然有效;因為法庭認為佢有正常智力同精神上嘅行為能力,例如佢每日可以打幾個鐘麻將,又可以每日騎單車接送孫兒返學返屋企。

「為make sure你前夫畀間樓個女嘅合約有法律效力,你可以考慮先叫佢問問佢嘅精神科醫生嘅意見。

「如果精神科醫生驗證過,認為你前夫雖然有depression,仍然有足夠嘅精神行為能力進行交易/送贈,咁最好叫前夫除律師外,搵埋精神科醫生見證下簽署合約。醫生同律師最好簽名並寫清楚他們認為當事人簽名時有足夠精神行為能力。當然如果可以搵夠兩個獨立嘅精神科醫生驗證就更穩陣啦!『春小姐』,咁佢而家浪子回頭,你受唔受先?」

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads