熱門:

2017年5月22日

蘭詩 視線所及

病假紙係免死金牌?

上星期香港律師會110周年在會展開ball,大事慶祝。因為dress code是black tie,全人類粉墨登場,結果驚喜連連。其中我們律師樓新人王之一的美少女「小R」律師的黑色露肩泰山裝又索又型,確實令人眼前一亮。不過,驚喜度仍不及平時禾稈冚珍珠的「甘甘」律師超deep v晚禮服下那條媲美「高ling」的4吋事業線!

我們的一圍中,只有一位non lawyer-少奶奶「雪莉」。她見反正「老公仔」出差了,就來湊湊熱鬧,試試被110圍律師包圍的感覺!

戴上bling bling首飾、悉心打扮過的「雪莉」,一到埗已經表現得好苦惱,她說:「啱啦,今晚你哋成班律師,可以醒吓我!我老公間公司仔,幾個月前請咗個『公主癌』蛋散秘書,成日詐病唔返工,搞到其他同事成日要三個人做四個人嘢。

「初時佢一個月先請幾日,我老公心諗佢可能『姨媽到』,忍佢。但後來愈來愈離譜,逢星期五同星期一都高調『射波』,自製long weekend。有次請病假唔返工去camping,仲夠薑pose嗰日去遊山玩水時嘅相上Facebook!

「Admin話佢有備而戰,次次一定叫佢做醫生嘅uncle寫張醫生紙畀佢做免死金牌。所以佢明知佢其實唔返工、去咗玩都惟有照出糧畀佢。」

九個律師十個意見。全枱lawyer紛紛搶着指點「雪梨」。金牌師爺「橙餅」先聲奪人說:「吓,長期返三日工放四日,但又出足七日糧咁爽?哈哈!你老公公司仲請唔請人呀?『雪梨』妹,唔係凡請sick leave有張cert就一定要出糧㗎!

「根據《僱傭條例》第33條,一、病假要最少連續4天;二、日日都有醫生紙support;三、員工亦已累積到足夠嘅有薪病假。三個條件有齊晒先sick leave都要出糧㗎!而且都只係需要出五分之四,唔係full pay!

「任何僱主,如無合理辯解,法定有薪sick leave唔出五分之四,即屬違法,可被檢控,一經定罪,最高可被罰款5萬元。

「順便教埋你計累積有薪病假!根據《僱傭條例》第33(2)條,頭一年期間,每做滿一個月,就可儲2日有薪病假;一年之後,就每做滿一個月可儲4日。最多可以儲到120日!

「你個『公主癌』員工返咗幾個月,已經個個禮拜請病假兩日,所以應該唔會夠『法定有薪病假』cover咁多日囉!而且又唔係連續4日或以上。所以,除非你份僱傭合約另有規定,你係唔需要出sick leave pay畀佢㗎!

「其實詐病呃sick leave,係件好嚴重嘅事!除咗可能無糧收,分分鐘會收埋大信封,即時無得留低!甚至可能犯下刑事罪行,留埋案底㖭!」

「雪梨」O晒嘴問:「吓,乜咁大鑊㗎?」

(待續)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads