熱門:

2016年9月26日

蘭詩 視線所及

江湖救急

最近經濟麻麻,以往靠炒股炒樓而身光頸靚的紛紛變哭喪樣。就連一批腳踏實地的生意人也個個愁眉苦臉,沒精打采。

從小到大,不知為何,身邊經常有朋友因種種不同原因,需要向我借錢「江湖救急」!在這樣的市況下,情況更「誇」!

但是我曾試過做好心借錢給一個從少女一起玩到變「中女」的好姊妹,結果弄得人財兩空!因為原來朋友不想或不能還錢時便會自動失聯,不願再保持聯絡。

由那次開始,我決定從此不管任何理由,也不會再「放數」給朋友!

今天突然收到「史丹」來電,原來他的朋友也有相同的煩惱。他說:「女神,有個friend話佢有個唔係好熟嘅朋友,想問佢借200萬元應急,offer年息50厘!息口超吸引, 但佢又驚無放債人牌,放數收息會犯法。所以叫我問問你。」

我答:「經營貸款業務嘅人(不論有無同時經營其他業務),根據《放債人條例》, 必須攞牌。否則,即屬犯罪,最高可被處罰款10萬元同埋監禁兩年。

「條例亦訂明,如果屬放債人但又無攞牌,就無權喺法庭追討任何貸款項同利息。

「不過,唔係所有人或者公司一借錢畀人,就算係放債人嘅。根據案例,法庭會視乎每一個案件嘅實際情況去決定該公司/人士係唔係『經營放債人業務』。例如放債係咪有系統、重複同有連續性嘅業務,放貸者同借貸者嘅關係,同埋放貸嘅金額、目的等等。

「喺『1993 HKCU 428』一案,原告同被告係親生兄弟。哥哥借咗600萬元畀細佬搞生意,細佬唔還錢,最後反目成仇。哥哥就告到法庭向細佬追債。細佬就辯稱哥哥係冇牌經營放債人業務。最後法庭裁定哥哥唔算『經營放債人業務』,佢純粹為咗幫親兄弟。所以唔使攞牌!

「順帶一提,至於利率方面,根據第24條,任何人(不論係咪放債人)以超過年息60%嘅實際利率貸款,即屬犯罪,一經定罪可被罰款500萬元同監禁10年。

「另外,如果實際利率超過年息48%, 法庭即可假定交易算敲詐性。如果法庭認為交易屬敲詐性,法庭就可以喺顧及所有情況之後,頒令雙方重新商議交易,令雙方均獲公平對待。

「要裁定係咪屬敲詐性,法庭會顧及所有嘅情況,包括債務人嘅年齡、經驗、做事能力、健康情況,貸款人同債務人嘅關係,喺達成交易時債務人所受嘅財務壓力等等。

「喺『DCCJ4057/2004』一案,被告同原告係認識多年嘅朋友,被告人因為生意周轉有困難,原告人於是分咗幾次借錢畀被告人,但年息均超過48%。原告去法庭追數。但被告人辯稱,原告人貸款行為構成放貸業務,應該要攞牌。而且貸款年息達48%,屬敲詐性。最後,法庭認為原告人只係幫被告人解困,並唔係經營放債業務。至於息口,被告人係成年人,身體又無病,雙方亦認識多年,所以裁定年息48%不屬敲詐性,被告要畀欠款及利息。」

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads