熱門:

2016年2月16日

文潔華 生命通識

顛倒是非

驚慄電影,其實每天都在現實生活的香港裏發生,以下是真實片段。

一名乘客日前在九龍城喇沙利道上的士,前往機場。

航班開8點,上車已是6:30分,交通尚算暢順。車子駛往龍翔道,乘客發現司機軚盤前放置了四部電話。他側着身子向着其中一部電話大聲說話:「喂,你留低電話號碼,我一陣俾晒聯絡你替我接客。」其後他表現甚為忙碌,又打出了幾通電話,說話聲量愈講愈大。

的士司機隨後又轉了一個急彎,繼續講電話。那急彎弄痛了乘客的腰患,她忍不住說:「司機,可否小心駕駛?」這話顯然觸動了司機的神經,他以高聲量回應:「小姐,你條命矜貴,我條命唔貴過你?你而家咒我,有報應嘅。我揸的士幾耐你知道嗎?從來無出過事,如果而家出事,都一定係因為你,你心地唔好!」

乘客解釋因為剛才那手急彎弄痛了舊患,所以要提醒一下。「點解你腰會痛?係唔係腎癌?你個人脾性唔好,所以就有事囉。我一睇就睇出你嘅品性,我讀心理學㗎,又通易經,又懂道家。做人要有忍耐,怪責人哋係唔好嘅行為,所以你就健康有問題囉。我尋日都車咗個脾氣唔好嘅大律師上山頂,同佢嘈起上嚟;終於佢老婆係個明白事理嘅人,仲同我道歉,話叫我唔好怪佢先生。你無人咁叻,又唔知死。」

乘客按捺不住,請司機別要在農曆新年說話不吉利。「你再驕傲,信唔信我轉急彎留低你喺深水埗?我而家唔做你生意!呢架車係我自己嘅,我鍾意點都得!我話事。」

乘客看時間,離航機開出只有一小時,原本可以以「拒載」還擊,但還是選擇啞忍。「睇你個樣,住喇沙利道,又有工人陪你上車,一定有個錢就以為自己大晒。你話俾我知,你做邊行?抑或唔使做!」乘客做戲咁做,低聲下氣,喃喃說自己是教書的。

「吓,教書!唔怪得之,教學生雨傘運動,又唔返學搞罷課,不知所謂,都係你班為人師表,不負責任。睇你梗係慫恿班學生出旺角生事喇!人企你又企,人掟你又掟,俾人利用又唔知。好似你咁,淨係識話人唔啱。每個人都要做好自己本份,我大可以唔車你去機場,睇你個病樣,我做好心,原諒你!」

乘客忍無可忍,靜靜取出手機,趁司機繼續出言不遜之時,對準司機證卡擦兩下,好留下記錄,予以投訴,誰知卡擦之聲太大。「喂,你是否拍我司機證?」乘客否認,說是自拍而已,車廂頓時鴉雀無聲。未幾,的士已抵達第一航廈,司機謹慎地找數,幫忙拿行李,並取來手推車。「小姐,我知唔係剩係你有問題,我自己都有問題,唔好怪來怪去嘞。總之顧住,小心!」乘客怒不可言,眼看航機就要起飛,只好保留投訴權利。

這是現實的香港,不分青紅皂白,政治話題濫用,語無倫次,雙重標準,思覺失調,顛倒是非;但又以目前實際利益為要務,實在沒有條件理直氣壯。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads