2015年12月21日
最愛遊山玩水!年紀小小已走遍世界各地!唯獨是非洲,一直未敢涉足。坦白說,對非洲認識甚少,只從National Geographic和Discovery Channel中得知有big five看;而從「哥哥」的《金枝玉葉》就得知動物migration甚震撼!
已「心思思」想試「零距離」接觸Wildlife很久,不過「又要威又要戴頭盔」。又怕治安不好,又擔心衞生情況;總是「心大心細」!
終於「時辰到」了。跟隨父親在南非營商多年的「非洲鞋王」「鳥臣」volunteer帶隊遊非洲!我們四個「小生」再加三個「索女」到Johannesburg會合一對couple;
「九男女」暢遊非洲!
「南非酒」近年在東南亞嶄露頭角;細心的「鳥臣」除了安排我們到game reserve看動物和Graft看diamond外;當然也有「酒莊clubbing」環節。去了Tokara、Mont Rochelle、Eagle's Nest等多個酒莊「喪玩」tasting!南非酒出名good value for money,各式各樣的紅白酒都比蒸餾水還便宜。望着一大片葡萄園,一邊品嘗這個園出產的酒;別有一番風味!
「鳥臣」和「立度」一早預料了我們這群「酒鬼」晚飯後一定個個變「醉貓」,「醒目地」選擇了入住在其中一個酒莊中的酒店。這個Steenberg酒莊也確實值得一讚。餐廳和酒店的服務和食物質素都完全滿足到我們這班spoiled「港男港女」。
晚飯時大家吃非洲「野味」Springbok, 望到旁邊一枱「非洲」客人,一男三女進餐;「亨少」即說笑問「鳥臣」:「咦,一王三后咁爽!非洲law係咪一夫多妻制㗎?」
已經半醉的「鳥臣」笑答:「咁又唔知喎!不過香港係一夫一妻制,咪一樣大把MBA!何況你同『阿Dr』又未結婚,『劈腿』無罪!哈哈!」
坐在旁邊的「阿Dr」轉數超快,即回敬「鳥臣」說:「『鳥臣』,上次女神都教過啦,即使結咗婚去『偷食』都無犯任何刑事罪行嘅!而且雖然『通姦』係申請離婚嘅理由,但唔會影響財產分配嘅!所以返香港之後,就由你做MBA帶『亨少』一齊去『覓食』啦!」
雖然知道「鳥臣」、「亨少」都屬「講就無敵,做就無力」一族,但剛在替一對結婚多年好友夫婦辦離婚的我,仍是有感而發地說:「以前細個憧憬找到true love,穿婚紗;喺個神父面前雙方四目交投,take vow,什麼生老病死,至死不渝;好不浪漫!而家世界真係變咗啦!自從上年終審法院就pre nup(婚前協議書)嘅新案例出咗,我啲有米client紛紛叫我幫佢哋出招,叫未婚妻/未婚夫簽pre nup!最得人驚係,即使已經結咗婚表面好sweet嘅couple都靜靜雞搵我叫我獻計,氹另一半簽post nup協議書。搞到我就快有婚姻恐懼症!」我還未「發完牢騷」,全枱人都異口同聲地問:「咦!乜有post nup agreement嘅咩?」(待續)
訂戶登入