《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2020年1月21日
德勤．關黃陳方會計師行（德勤）近期連環「劈炮」，辭任多間上市公司核數師，至上星期五再有兩間上市公司公布德勤辭任其核數師，由去年12月中至今，德勤辭任核數師嘅數目，已多達27間。
對於德勤瘋狂劈炮唔撈，上市公司公布德勤辭任因素不外乎「核數費用水平」、「目前工作流程下的可動用內部資源」，以及「與核數有關的專業風險」等等，而會計界朋友嘅分析係，德勤要收緊內部compliance（合規），提升審計質素，所以對一批被視為盤數屬較高風險嘅客戶唯有割愛。
睇番德勤所辭任核數師工作嘅27間上市公司，公布德勤辭任嘅同時，大部分已公布有另一核數師替換補上，當中大部分接手嘅會計師樓，喺香港排名十大之內，即係排除Big 4以外嘅second tire，當中不乏國際知名嘅會計師樓。
更有部分公司同樣換番Big 4其餘三間大行，咁即係呢批公司盤數，又未至於有具規模嘅會計師樓唔想觸碰嘅問題，即係跟「與核數有關的專業風險」無關。不過其中亦有三四間至今仍然未搵到核數師補上，無乜大行肯接手的原因就不便推測了。
阿Man就收到風，德勤無剌剌咁樣大洗太平地，原因係香港管理層希望提升審計質素，同時錫住夥計，唔希望員工喺工作量太多，工時太長嘅情況下，可能出現走漏眼情況，引致審計工作可能出現問題甚而孭鑊。
公司最終決定核數合約到期，就盡量推job，減少員工work load，客戶方面就貴精不貴多。更有傳聞指每條team嘅阿頭，要嚴格遵守每名核數師一年只可以開工1600小時呢個規定，而一年1600小時可以做啲乜，咪大約係一單IPO另加三個retaining client（保留客戶）咁大把。
收天價核數費
咁點樣做到貴精不貴多，較為可行方法就係收取一個天價嘅核數費，而加幅係現有合約嘅三至四倍，閣下肯畀就有得留低，唔肯畀就無奈分手。過往Big 4之中，德勤為咗搶市佔率，平均嚟講核數費總係較其餘三間高出少少競爭力，如今德勤跟合約到期客戶傾續約時，開高三至四倍核數費，咁樣獅子開大口，你就算唔想走，人家都選擇分手。睇番大部分德勤辭任核數師嘅上市公司，都係話「核數費用水平」、「目前工作流程下的可動用內部資源」為辭任原因，甚少係涉及到「與核數有關的專業風險」，講到底都係錢作怪，主要係新核數合約加幅太大而唔續約，所以要換核數師。
同時阿Man亦聽到市場流傳另一個傳聞版本，係涉及較敏感嘅政治因素，有些公司嘅政治立場鮮明，公司唔想被標籤，索性辭任其核數師之職。但與此同時，又怕畀人話過分自我審查，唯有辭任埋合約差不多到期嘅其他公司作掩護。不過用廿幾間公司嚟掩護一間公司，又似乎講唔過去，難令人信服。總之德勤今次大洗太平地，連環劈炮，原因實在係耐人尋味。
麥狄文（徐狄怡．證監會持牌人）
訂戶登入
| 下一篇： | 莎莎唯愁旅客未回頭 |
| 上一篇： | 中軟國際估值便宜值吸納 |
