《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2019年12月16日
雖然中美貿易談判傳嚟好消息，中美首階段協議或於1月份完成簽署，理論上大大減低明年全球經濟下行壓力，但貿易戰對經濟影響並未完全反映，就以香港為例，連財爺對明年經濟預測都較為悲觀。香港唔單止受已持續超過一年嘅貿易戰拖累，由今年6月初至今仍未完結嘅社會運動，更令香港經濟雪上加霜，商界受到不同程度衝擊。最明顯當然係旅遊、零售及餐飲業，街上或各大商場多咗吉舖，旅客數目顯著減少，令人好清楚睇見呢幾個行業所受影響有幾大。
其實除咗上述呢幾個行業，傳媒受今次社會運動影響亦唔小。就以過往一直一台獨大嘅電視廣播公司（00511）（TVB），最近就有消息指為保住下季度業績，決定裁減人手止血，擬於本月底再向製作部及綜藝組開刀，受影響員工多達800至1000人。TVB由社會運動爆發至今，一直被批評報道手法偏頗，被支持運動及推動黃色經濟圈嘅網民呼籲抵制杯葛。對於TVB呢個裁員消息，唔少黃朋友均拍爛手掌，認為群眾力量呼籲抵制及罷睇行動，已成功嚇怕唔少品牌，唔再跟TVB更新廣告合約，直接導致TVB收入大減並走上大幅裁員之路。
黃色經濟圈威力未及科技變化
唔單止被黃色經濟圈支持者杯葛嘅TVB要裁員減開支，喺社會運動被視為致力報道真相、得到黃色經濟圈支持嘅香港電台，而且「香港電台視像新聞」Facebook專頁追蹤人數由 10 萬人增至 78 萬人，32台收視亦上升，理論上應該係呢次運動的傳媒行業受惠者。不過，增加直播時數及為員工添置裝備，令其本財政年度超支500萬元，公司需要削減人手，下年度預算亦不會增加。工作做得好，卻因為係政府商經局轄下部門，未獲嘉許之餘，反被變相懲罰，即係就算有黃色經濟圈力量支持，亦未必等同廣告收入增加。
阿Man唔排除黃色經濟圈可發揮部分威力，但講到底，科技資訊變化影響整個傳媒行業。近呢大半年以嚟，普羅大眾對新聞關注程度大增，理論上無論傳統電子媒體嘅收視率、又或紙媒嘅出紙量，甚至係網上點擊率等，都應有所提升，咁情況之下，廣告收益理應隨之增加。
不過，近年電子媒體及社交平台普及，商界喺傳媒行業的廣告支出分布亦出現翻天覆地的變化，喺傳統媒體包括電子傳媒、紙媒或網上傳媒嘅廣告費支出大減；相反，喺其他媒體如社交平台或透過網絡紅人KOL賣廣告嘅支出，則節節上升。
企業推廣模式轉變令傳統媒體廣告收入減少，唔係今時今日嘅事，呢種轉變近五年來愈見明顯，唔單止電子傳媒廣告收入大減，傳統紙媒廣告收入亦大受打擊。有睇開報紙雜誌嘅朋友應該留意到，近年嘅報紙雜誌愈嚟愈薄，主要係唔少紙媒都致力發展網媒業務，商戶都改咗喺網頁版落廣告。與此同時，網媒數目增加，自然攤薄各傳媒嘅電子廣告收入。雖然呢兩年未見紙媒有大規模裁員行動，但其實幾大紙媒一直削減人手，只不過係攤開嚟炒人，每季甚至每個月派十個八個大信封，又或者係鼓勵自然流失，有人辭工後就順手cut head count，唔覺唔覺一年就減少百位數人手。
可能大家會問，炒晒啲人咁邊個做嘢？改為外判或喺網絡搵料，左抄右貼堆滿內容，一樣交到差，總之就要睇住盤數，減低養人成本。反正喺資訊滿瀉嘅年代，網上新聞更新時間更快更短，當中即使有錯漏或缺失，亦唔會好似過往咁易被發現，呢個亦係新聞質素每況愈下的原因之一。
麥狄文（徐狄怡．證監會持牌人）
訂戶登入
| 下一篇： | 盈利增長主導美股後市 |
| 上一篇： | 不說不知的PE運作方式 |
