熱門:

2019年10月21日

麥狄文 金融街密語

澳交所作為回歸大禮得啖笑

上個星期全城焦點當然係特首嘅《施政報告》,當中針對房屋政策成為城中熱話,新措施能否解決房屋問題,阿Man不置可否,但歷史上首次未能於立法會內宣讀,改為預錄播片,林鄭都算打破紀錄,貫徹佢一向事事要攞第一嘅作風。當大家都熱中於討論,甚至聲討新一份《施政報告》嘅同時,其實上星期仲有單甚為juicy嘅消息,就係有關澳門(馬交)將設立證券交易所嘅計劃浮面。

最搞笑係廣東省地方金融監督管理局官員稱,澳門建立證券交易所的方案已經呈報中央之際,馬交嘅經濟財政司司長隔咗兩日先如夢初醒表示,佢都係透過傳媒先得知呢個消息,而澳門政府則未就建立證券市場等事宜,向中央提交報告。咁又難怪馬交自己都未知發生乜事,皆因廣東省嗰邊就話成立澳門證交所,係送畀澳門回歸20周年嘅大禮,或者想保持神秘,咪連澳門本身都唔知乜事囉。

呢個消息當然係香港金融圈內熱門話題,阿Man有行家直言,近幾個月嘅社會運動反映香港人唔聽阿爺話,事事多多聲氣,甚至要同阿爺搞對抗。之前阿爺已有意思扶持深圳取代香港嘅國際金融中心地位,如今再開聲話要喺澳門搞證交所,話唔定係阿爺心目中,取代或攤薄香港作為國家嘅國際金融中心嘅B計劃,始終澳門同胞一直乖巧,令阿爺放心得多。

事關內地資本賬一日未全面開放,人民幣未能自由兌換,無論已經講咗廿年話要由上海取代香港成為中國嘅國際金融中心,又或者近日講到嘅深圳都好,都未具備成為國際金融中心嘅條件。而馬交基本上同香港都係「一國兩制」下嘅自治城市,資金可自由進出之餘,澳門元跟港元實際掛鈎嘅同時,亦變相跟美元掛鈎滙率跟香港同樣算穩定。

人幣資金池僅香港十分一

只不過睇番全球咁多國家,就以資本市場規模最大嗰幾個嚟講,基本上都只能容納一個國際金融中心,好似德國只有法蘭克福、英國只有倫敦,作為全球資本市場一哥嘅美國,亦只有一個紐約證券、外滙交易中心,芝加哥只係商品及衍生產品交易中心,而波士頓亦不過係資產管理中心。

所以呢,即使上交所跟深交所搞咗咁多年,就算每日平均成交額亦超過港交所(00388),始終未能成大器,莫講話要取代香港國際金融中心地位,暫時拍馬仍未追得上。

至於阿爺嘅所謂Plan B,澳門證交所則初步構思為「人民幣離岸市場的納斯特」,即係會以科技股、初創企業為主要上市公司來源。呢啲公司特點多為高增長、高風險及低派息,啱唔啱所有國際投資者胃口,真係無水晶球點知!

再睇番截至今年8月底香港金管局嘅數字,本港離岸人民幣存款約為6441億元人民幣,港交所仲設有人民幣資金池,協助券商參與者為缺乏人民幣資金的投資者兌換人幣交易資金。

相對之下,澳門同期嘅人民幣存款只約511億元人民幣,不及本港人幣資金規模十分一。澳門要變身「人民幣離岸市場的納斯特」,喺人仔資金池遠少過香港市場嘅情況下,仲要突破埋過往港股發展人仔計價產品時所遇嘅阻礙,做得到當然係天才,做唔到喇喎,咪就係笑話一個。

其實國際金融中心地位,唔係自己話打造就可以成功,即使具備所有合資格條件,都要全世界endorse,呢一點阿爺認清楚。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads