熱門:

2019年8月12日

麥狄文 金融街密語

沽空機構具另類存在價值

沽空機構狙擊香港上市公司嘅例子多不勝數,而被狙擊嘅上市公司,通常都係被指賬目出現問題、造假數、隱藏債務等等,被狙擊嘅理由萬變不離其宗,就係盤數有問題。而年中亦有唔少上市公司被核數師保留意見,即係反映公司盤數係有啲問題,核數師睇完盤數,唔願意畫龜,結果當然係盤數零分重做,又或者換個核數師後,再執過盤數。

內部會計被要求造假數

通常上市公司內部都會有會計做數,由internal audit核實之後,再交予獨立核數師再核實,先會對外公布。阿Man最近聽到一個會計界生力軍爆料,佢向阿Man透露,曾經有上市公司要求internal audit做數嘅時候,隻眼開隻眼閉,賬目有問題亦要名照簽。當然,生力軍性格比較耿直,唔肯就範,一旦遇上手段較為強硬嘅老闆,當然係請呢位生力軍食炒魷魚啦。

後來,生力軍又遇上另一種老闆,就係以利誘之,提出只要internal audit肯喺問題賬目畫隻龜,甚至幫手指導如何將有問題賬目化個靚妝,執好個包裝,過到獨立核數師一關,就會重重有賞,額外有紅包花紅落袋。

阿Man好奇一問生力軍,講得出重重有賞,應該有唔少喺上市公司嘅內部核數師被打動,收收埋埋唔少着數。生力軍話其他行家係點,佢就唔知,但佢自己唔敢話自己好正直,只係一向奉公守法,唔合法合規嘅事,當然拒絕唔做。生力軍結果又要另謀高就,搞到自己轉工次數望落去多咗啲,為此亦唔再搵上市公司嘅內部核數做,寧願辛苦啲,去番工作較為繁重嘅核數師樓打工。

揭發惡行大快人心

生力軍更笑言,唔知係咪自己唔好彩,之前遇到嘅老闆出手較低,定係之前打工嗰間上市公司規模較細,老闆所指嘅重重有賞,連一個月人工都冇,絕對唔值得去幫間公司造假數,一旦被發現就前程盡毁,因小失大,自己膽小,當然唔會就範。

當然生力軍係個乜嘢人,阿Man心中有數,佢咁講係想表達,實在唔明點解會有人肯為嗰少少錢而出賣自己,同時亦慨嘆喺香港呢個一直被視為廉潔嘅社會,竟有如此不堪嘅公司文化。

沽空機構被指透過篤爆上市公司醜聞,再沽空該公司股票從中獲利,行為唔值得鼓勵,甚至有業內人士要求監管機構出手制止。只係有個別唔守規矩嘅上市公司,以為有錢使得鬼推磨亂咁嚟,當被沽空機構揭發惡行,實在大快人心。

當然,阿Man相信大部分嘅上市公司或者係市場參與者,都係循規蹈矩,合法合規。而沽空機構狙擊對象,亦常有誤中副車,行得正、企得正嘅公司,即使曾被狙擊,不實指控亦會不攻自破。但要對付少數害群之馬,沽空機構嘅存在,不失為對上市公司作出另類監管,某程度上對一般投資者同小股東,未嘗唔係一件好事。

麥狄文(徐狄怡.證監會持牌人)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads