熱門:

2019年7月15日

麥狄文 金融街密語

百威亞太上市撻Q 孖展客躺着也中槍

全球最大啤酒生產商百威英博(AB InBev)宣布,考慮到當前市況,決定擱置分拆百威亞太(01876)在港上市計劃。早於百威英博發聲明前,已有謠言滿天飛,指公司未能喺上周五確定招股價,公司上周完成招股,本來計劃發售近16.3億股,每股招股價介乎40至47元,集資額超過760億元,係今年以嚟全球最高集資額新股。招股部分5%為IPO,其餘為國際配售,之前有消息傳出IPO吸引11萬人認講,超額認購約11倍,凍結資金440億元,係今年以嚟凍資最多嘅新股。

對於今次百威亞太上市撻Q,阿Man喺呢兩日收到唔少粉絲詢問,若然以孖展認購,係咪仍要付出利息?阿Man喺呢度統一回覆,答案當然係要畀啦,歷久以嚟一旦新股撻Q,上市不成,以孖展認購嘅客戶,都係出師未捷身先死,新股胎死腹中後,硬食輸孖展息。以今次百威亞太IPO申請為例,上周四截飛book close,利息由當日開始計算。但公司家陣褪軚取消上市,即今明兩日申請人將獲退款,證券行就會收取上周四至今明兩日期間嘅利息,大約係四至五日嘅孖展息。

最大頭槌飛料輸逾90萬

再睇睇今次百威亞太嘅大額認購,即頭槌飛之中,最大張飛認購4066.35萬股新股,支付認購金額約19.3億元,以孖展認購向證券行借足九成的話,以年息率3.88厘計算,5日利息支出為92.3萬元。換句話講,呢張頭槌飛喺百威亞太上市計劃胎死腹中後,無啦啦就輸咗超過90萬元喇,呢鋪都可以話係躺着也中槍。

有粉絲繼而表示,家陣係百威忽然煞車話上市又唔上,無理由要申請人硬食支付利息,係咪可以同證券行拗數唔畀息呢? 唔好意思,歷來以孖展申請新股,利息都係由客戶支付,況且係你情我願嘅事,相信喺認購新股相關借孖展嘅申請表格裏面,應該寫得好清楚,喺任何情況之下,申請客戶都需要支付相關認購孖展利息。

白紙黑字簽咗當然無數拗,但道義上嚟講,百威亞太母公司百威英博,無啦啦截停上市計劃,某程度上係要負上責任。公司聲明表示唔將百威亞太上市,其中一點係「目前的市場條件」,睇番上星期即百威亞太招股期間,港股未見出現明顯變化,而港股喺上周嘅成交金額,亦未見有任何異樣。以市場條件作為截停上市原因,似乎有點講唔過去。若然公司認為市場條件不適合上市,為何唔索性連招股呢個動作都慳番,何以到定價一刻先嚟叫停,連累以孖展認購嘅散戶,無啦啦輸幾日利息。投資者嘅利息損失,由邊個埋單找數,實在值得商榷。

僅銀行券商係贏家

今次百威亞太上市撻Q,只有借錢出嚟嘅金主,即係銀行同證券行係贏家,除咗贏咗認購新股手續費外,亦賺咗幾日利息。雖然即使百威亞太如期上市,孖展認購客都未必係贏梗,但總算有個機會博一博,家陣百威上市臨時甩底,就係人為造成,而且係百威英博一手造成。如此一來,孖展認購新股嘅制度,其實係咪有值得檢討嘅地方,任何投資都有風險,咁以後新股於招股期間,係咪需要喺招股書列明相關風險,認購申請人要注意公司若然未能成功掛牌,所有損失由申請人自行承擔?

麥狄文(徐狄怡.證監會持牌人、滙盈資產管理.董事總經理)

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads