2019年6月3日
上周阿Man喺本欄爆料,有關港交所(00388)嘅上市委員會有人離職,呢次唔單止係港交所一次清理門戶,喺調查過程中,所涉及嘅十幾廿個上市公司申請個案當中,調查小組高度關注負責呢批上市個案嘅核數會計師,以及保薦人,是否有人涉及疏忽遺漏或失職,聽聞已有兩家會計師樓及幾個保薦人(6號牌)被盯上,嚟緊嘅公司上市申請,如果上市團隊有呢啲成員,將會特別關注,望多兩眼。
當然港交所嘅上市委員會喺審批過程中肩負重任,為提高上市公司質素做好把關工作,對香港股市係好事,不過有時保薦人都幾無辜,尤其係公司獲批上市之後,啟動IPO嘅配售跟包銷工作,並唔係由保薦人負責,尤其係上市初段,有公司涉及「圍飛作歹」,股價被舞高弄低,本來就係證券銷售同買賣活動,即係由1號牌負責,但偏偏喺2016年「上市文件改革」之後,一向只係做上市前盡職審查,同埋負責上市文件嘅6號牌,喺上市流程改革之後,就乜都關佢事,無論港交所跟證監,都係追住個6號牌嚟問,搞到保薦人一頭煙。
保薦人唔單止被問長問短,稍有差池更會被「貼堂」,由於2014年開始推行「貼堂制」,規定保薦人提交上市申請時,要喺港交所嘅「披露易」網站刊載上市申請版本。
上市申請不成功,最大鑊係「被拒絕」及「被發回」,前者係針對申請上市公司嘅質素,後者則針對保薦人未有盡其責任。簡單嚟講,上市申請「被發回」,即係代表保薦人無料到,畀人貼得堂多,以後想搵保薦生意都難。
6號牌成投行王牌
今年3月份,證監會就連珠炮發,向4名保薦人,包括瑞銀、渣打、美林及摩根士丹利開出史上最大罰單,夾埋罰咗呢4間公司接近8億元,瑞銀被罰得最重,唔單止被罰款3.75億元,兼且仲釘咗個6號牌一年。
雖然保薦人可以講得上難撈,但大型新股上市,投行仍然爭崩頭,希望搶到個保薦人嚟做,即使近年嘅保薦費,有唔少外資大行面對中資投行加入競爭,已由最少100萬美元(約780萬港元),降價至500萬港元都有得傾,如果集資額大嘅話,做埋承銷嘅佣金就好油水,皆因主板嘅承銷佣金介乎集資額嘅1.5%至3.5%之間。
集資額較高嘅公司,喺承銷佣金方面嘅議價能力較高,好似舊年上市嘅小米(01810),即使承銷佣金被壓低至1%,但承銷團隊仍輕輕鬆鬆袋走3.7億元佣金。做一兩單呢啲上市刁,已足夠養起公司唔少人。
所以到目前為止,企業融資,亦即係6號牌仍然係股票市場最好賺嘅生意。最近傳出阿里巴巴有意嚟香港作第二上市,而中美貿易戰亦有機會驅使更多在美上市嘅中概股投奔港股,6號牌保薦生意係就係高風險,但危中有機,仍然係各投行手上嘅王牌。
麥狄文(徐狄怡.證監會持牌人 滙盈資產管理.董事總經理)
訂戶登入
下一篇: | 華為陷雙邊市場效應困局 |
上一篇: | 沽空機構新蠱惑陰招 |