為減持出奇招

各位「巴打」，2018年香港十大流行潮語，是由「係愛呀？定係責任？」（是愛嗎？還是責任？）榮登榜首。哈哈！如果一間公司從上市以來，大股東大部分時間都不離不棄持有，到底是愛還是責任呢？

但「高仁指點」話你知，在股票世界裏面，有時候持股一日，都還嫌時間太長；如果大股東希望減持股權，有可能被指背棄愛或違反責任，就只好靠奇招突圍而出。

程更計：（明知戴Sir想減持，但婉轉地發問）戴Sir，我最近聽啲行家講，你搵緊啲投行傾「刁」喎，有冇嘢可以幫到手呀？

戴孤劃：（普「東」話，即普通話＋廣東話）沒錯……我想配售一間長期持股的上市公司部分股權，而去年我已經出售一部分股份，並且承諾一年內不會再減持股份，所以不知道怎樣才好？

高　仁：哈哈！戴Sir，你呢個case咪好似騰訊（00700）嘅南非大股東Naspers咁囉。Naspers早喺2001年入股騰訊，舊年3月趁騰訊業績後首次減持，以每股405元出售約2%股權，套現近770億元，並向投資者承諾3年內唔再減持，但最近Naspers又蠢蠢欲動。

戴孤劃：這就是既要做婊子，又要立牌坊。我就有資金需求，Naspers的目的又是什麼呢？

程更計：Naspers係騰訊嘅大股東，但持股只有31%左右，既冇控制權又冇營運權，但想大手減持又太難，市場好難消化晒批貨，恐怕會愈賣愈低。如果騰訊大吉利是執笠嘅話，Naspers只係作為公司股東之一，債項償還優先次序可能會排喺最後。

Naspers剝離業務變相沽騰訊

高　仁：再者，Naspers本身喺南非上市，市值折合約7600億港元，但單係手上31%騰訊股份，價值已高達1萬億港元，存在太大嘅控股公司折讓，一定要諗方法去釋放價值。

戴孤劃：咁Naspers怎辦呢？

程更計：Naspers為咗避免畀人話出爾反爾，就諗到將旗下互聯網業務一併「打包」剝離（註：剝離有三大方式【表】）上市，除咗騰訊31%股權之外，仲包括俄羅斯互聯網企業Mail.Ru、德國外賣企業Delivery Hero及印度外賣平台Swiggy，資產可以得到重新估值，業務劃分亦更加清晰。

高　仁：根據初步構思，Naspers會保留新公司75%股權，其餘25%會透過資本化發行（capitalisation issue）予Naspers股東，而股東喺特定限制下可選擇收取更多Naspers股份以取代新公司股份。換言之，Naspers沒有直接出售騰訊股份，但卻做到變相減持同釋放價值嘅效果，勁呢！

荷蘭上市拓闊投資者層面

戴孤劃：這不是在打擦邊球嗎？我聽說，Naspers打算把新公司分拆在荷蘭上市，但新公司跑到老遠上市幹嘛？

程更計：戴Sir可能有所不知，荷蘭阿姆斯特丹交易所近年積極發掘科技企業上市，部分企業估值仲要相當高，相信有利新公司釋放價值。況且Naspers、騰訊同新公司喺3個不同地點上市，仲可以接觸更多國際投資者增加需求，亦令到股東層面更廣泛。

高　仁：哈哈！呢個咪係Naspers為咗減持騰訊，而可能使出嘅奇招囉！

戴孤劃：聽起來很不錯啊！我也要回去調研一下。

本欄逢周一刊出

如想與高仁交流上市公司的財技個案及招數，請電郵至 [email protected]。