2019年3月18日
證監會上周四向保薦人開出歷來最大額罰單,一天內公布向4個保薦人包括瑞銀(UBS)、渣打、Merrill Lynch Far East(美林)及摩根士丹利(大摩)罰款合共近8億元。
當中瑞銀罰得最重,除罰款3.75億元外,更吊銷其就機構融資提供意見(俗稱6號牌)一年,主要係懲戒瑞銀喺3宗上市申請,包括中國森林、天合化工及另一家正在調查中嘅公司,作為聯席保薦人卻未做好本分,簡單嚟講即係盡職審查(DD)有唔妥。
重罰四投行展姿態
雖然證監未披露第三間上市公司身份,但翻查之前由UBS經手而又出咗事嘅民企,好大機會係2009年上市、遭證監勒令清盤嘅中金再生(00773)。睇番呢3間公司嘅共通點,都係內地民企,上市集資額動輒幾十億,今次UBS被罰三幾億兼釘6號牌一年,相對市場及小股東嘅損失只係濕濕碎。
過往證監經常被非議「只管雞仔唔管麻鷹」,對外資大行特別格外開恩,但本地卜架涉違規即殺無赦,除罰款外,釘牌往往係永久性,有咁重手得咁重手。而針對本地卜架亦有級數之分,畀人感覺係規模愈細愈「好恰」;對上市公司取態亦一樣,大企業往往從輕發落。
搜金利豐料有後着
今次對呢幾家外資大投行出手,擺明要話畀大家知,證監會唔單止要打大老虎,仲係無分國界,本地、外資甚或中資行,只要係違規都唔會放過。
自從2017年爆出「謎網50」後,證監會對三四線中小型上市公司,更加窮追不捨,而涉及呢單嘢嘅不但止上市公司,更有唔少被指跟「大夫」關係密切嘅卜架行遭查根究柢,涉事嘅難逃轉手或關門大吉嘅命運。
喺本月初,疑似跟大夫有千絲萬縷關係嘅殼后,其大本營金利豐亦遭大規模搜查,金利豐可以話係本地數一數二嘅大卜架,呢次證監出手,正係落實去年打大老虎之豪言。當日證監喺金利豐由朝搜到晚,仲要咁啱得咁橋,作為港區人大代表嘅殼后正身處北京兩會,證監就突襲。
謎網50事件暴風眼
自去年中秋節左右開始有消息傳出,大夫已從外地回港協助調查,時隔近半年,有關「謎網50」嘅調查未見絲毫進展,只有曾於去年底自願申請成康宏環球(01019)一案被告嘅玩具大王,喺本月初申請剔出被告名單。
不過,阿Man收到風,證監積極大規模搜查金利豐之後,下一隻大老虎目標仍離不開「謎網」這條線,尤其是早前風傳連繫多間三四線股仔嘅嗰位幕後玩家。
「謎網50」事件,可以話係為證監實行打大老虎開出一個缺口,本地卜架又或喺市場具份量嘅幕後玩家,今次難逃被證監查問。
至於金利豐對遭證監搜查一事則不予置評,強調未受影響,公司營運亦正常,又表示搜查同公司無關,證監只係攞咗客戶資料作調查。未知被取去嘅客戶資料,當中有幾人係證監心目中嘅大老虎?
阿Man只知道,喺港股呢個資本市場搵食,必定要循規蹈矩,一旦涉及違規,話之你係邊位,證監一樣唔會放過。麥狄文(徐狄怡.證監會持牌人)
放大圖片 / 顯示原圖
訂戶登入
下一篇: | 「金融周期」示警 債務高企釀風險 |
上一篇: | 捷榮拓新業務添動力 |