熱門:

2018年5月21日

方卓如 方如玉帥

必先餓其體膚

年輕人唔好為500方呎困住自己青春,但最弊香港嘅500方呎係平庸年輕人最佳善用青春嘅方法。有本事整隻獨角獸出嚟,固然之家山有福,但終日沉迷於製造獨角獸,覺得自己未成功必須繼續堅持,會令唔少家長擔心,會唔會變成唔夠腳踏實地。

其實家長唔使太過擔心,令郎/令千金能否製造獨角獸,其實有跡可尋,唔係問聖杯,首先睇佢係咪不斷問屋企攞錢。

製造獨角獸過程需要不斷攞錢,但絕對唔會問屋企攞,點解?問屋企攞可以攞得幾多?梗係問街外攞先攞得多。冇能力要外人落疊,問極都係問屋企攞錢,呢檔生意嘅生命力有限。

唔剪臍帶嘅細路仔點會識行識走?如果要畀錢仔女,畀錢佢做首期好過,至少個衰仔衰女仲要努力打工供樓,最壞情況佢仲可以有瓦遮頭,唔似做生意輸到渣都冇。

製造獨角獸要好捱得,因為天下武功,唯快不破,獨角獸煉成要用最快速度,否則被人一抄,獨角獸即時夭折。令郎/令千金如果晚晚可以返屋企食飯,食完飯坐定定睇電視,又可以早瞓,星期六、日又可以約朋友打波,佢都係適合打份工專心供樓較為恰當。

係精神上唔係肉體上

不過,最重要嘅係,令郎/令千金要有幾餓。夠狠,要做隻獨角獸出嚟嘅,一定係餓到必要時可以食埋自己隻手。

餓唔一定代表屋企窮,而家都好少有家庭餓親自己啲細路,大部分唔憂柴憂米,做又得唔做又得。餓,係要睇佢哋對成功有幾渴求。上一代唔成功等於冇飯食,今世代唔成功最多去歐洲流浪一年散心。餓,係精神上而唔係肉體上。年輕人餓唔餓,睇自幼庭訓,是否容許提早放棄,還是時刻有顆不成功不收費嘅心。精神上的餓,比起任何動力更緊要,而且比肉體上的餓更難。

內地點解咁多獨角獸?因為佢哋精神同肉體都餓到暈,每日都諗緊如何盡快食晒市場個餅。佢哋又餓,又快,又搵街外錢,最適合煉出獨角獸。香港要急起直追,唔係盡快愛國愛港搵啲過河資金填飽個肚,應該必先餓其體膚令自己雙眼通紅,撲出去狂搶市場個餅食落肚。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads