|
熱門:

2018年搵錢要更夠膽

方卓如| 方如玉帥

2018年1月10日

2018年唔使兩個禮拜,恒生指數超越31000點,成交過千億。

香港容許同股不同權,特首親自開口想阿里巴巴回來香港股票市場,今年目標50隻新經濟企業嚟香港上市。你睇吓銀行戶口,夠唔夠錢隻隻都買。要入表上市都要時間,唔會係一年內全部完成上市。可以預期未來日子,每季都有啲精品大隻新經濟股應市。隻隻超購一千幾百倍,上市後升幾日俾你賺餐飯錢,仲唔開心到暈?識買,梗係買番啲港交所(00388),獨市生意,賺硬。

2018年樓盤開售,北角海旁豪宅以區內破紀錄價出售,馬鞍山又加推再加推,銀紙源源不絕,起幾多樓賣幾多。

更多股票嚟香港上市,香港搵到食,更多人嚟香港住,樓價點會唔升?政府响立法會都講,辣招去到呢步,係冇得減辣,以免樓價上得更快。但辣招正正係令貨疏價錢乾升嘅原因,咁即係話,撤辣又升,唔撤亦升。你冇辦法旨意樓價下跌嚟遷就你,倒不如望股票令你發大達,夠錢買樓。

勿忘加密貨幣

但2018年,股票點升,樓價點升,都唔夠加密貨幣升得勁。2018年發達大計,你唔可以漏咗呢項偏鋒投機。唔好俾民間評論呃咗你,其實你輸股票嘅錢,往往多過你輸加密貨幣。股票你會大大注大大聲,加密貨幣你一定係細細注細細聲,買名都唔識讀嘅加密貨幣輸晒,銀碼唔及你買細價股輸五成。你估股票輸五成還是加密貨幣輸晒易啲?

另一方面,加密貨幣你而家入場都仲有機會升10倍,細價股狂炒,會唔會升10倍俾你走貨?地球上萬事都有風險,計到數嘅風險就可以接受,零風險只會在你死後先出現。你參與過冇息派嘅股票龐氏騙局,參與過租金回報極低嘅房屋龐氏騙局,點解唔夠膽參與可以短時間爆升嘅加密貨幣龐氏騙局?2018年,搵錢要比2017年更夠膽。

 

上一篇今年港股Party停不了 瘋牛最堪憂

下一篇今年聚焦亞洲 中國經濟轉型利好增長

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。