黃之鋒等人被美國議員提名諾貝爾和平獎,等於內地那個胡潤富豪榜,邊個名字報上了,邊個死。上一個中國人攞諾貝爾和平獎嘅,而家屍骨無全。最慘仲係佢家人,行蹤未明,不知是死是活。外國人如果是有心改善中國人生活,唔該做到底,做到見效為止。否則,只係講兩句說話,擺一點姿勢,提名甚至頒一個獎,到有利益關係時候,即刻隱形,受害嘅就係被報上名字嘅人。黃之鋒等人條命已經唔再係普通學生或普通人,如何走下去,需要嘅智慧同勇氣係無人可以傳授,未來幾十年流流長,靠佢哋自己造化。
美國預期通脹升幅加快,利率將會持續上升,10年期美國國債升穿2.8厘,未來超低息超低通脹環境不再。究竟呢個係壞消息還是好消息?過去10年大印銀紙是因為恐防世界步入通縮,跌落以往日本經歷的痛苦廿年。現在證明世界走出了通縮漩渦,經濟持續增長。掉番轉,而家害怕過去大印銀紙之後,會引發惡性通脹,而家要先行加息,以防通脹不受控。負利率年代,銀紙不甘坐以待斃,會四出收購資產,令資產價格急升。現在銀紙開始有價,回報低嘅資產將會不受歡迎,冇質素嘅資產價格甚至下降。息口上升只係令人揀選資產更加嚴格,唔代表資產價格即將冧市。未來你繼續會見到股票樓價破頂嘅新聞,而公司清盤同銀主盤嘅消息亦會同時增多。容易賺錢嘅年代已經過去,但賺錢嘅機會依然處處。
加密貨幣嘅監管今年陸續有來,但唔代表加密貨幣玩完,相反現在才剛剛開始。比特幣最慘烈嘅時候,是2014年,當年秘密網站silkroad可以用比特幣買毒品,唔止網站負責人要拉去坐監,交易所負責人都拉埋,話佢洗黑錢,繼後美國就發牌監管比特幣,各種打擊下當時價格下跌七成。一隻小眾嘅加密貨幣,帶着邪惡標籤,價格下跌七成,當時如果你有貨在手,仲唔即刻離場?今天,比特幣開始入屋,個個都講緊blockchain,當佢認受性繼續提高,政府開始有清晰監管指引,難道會比今日更坎坷?比特幣唔會被消滅,但肯定唔受普遍政府歡迎。未來究竟係浴火重生還是一沉不起?而家你就係賭呢鋪。