如果牛市完結嘅先兆係要有大量散戶參與，咁最近嘅新經濟三寶抽新股可能就係散戶大量參與嘅訊號。以前牛市尾期有細價股飛升嘅現象，而細價股通常都係散戶參與嘅樂園，訊號明顯好多。而家藍籌股當細價股炒，瑞聲（02018）騰訊（00700）可以半年內勁升，細價股完全冇觀眾。在大戶散戶打成一片嘅情況下，令人好難睇通究竟市況到達全民皆股未。但係新經濟三寶抽股，全城瘋狂，確認散戶終於忍唔住要入市，開始信股市愈升愈有，開始覺得現價唔貴。如果你相信中環擦鞋嘅都同你講股票，咁就係見頂訊號，而家訊號已經着晒燈。雖然中環擦鞋呢個比喻應該要改改，因為坐响戲院里擦鞋嘅變成係女人多過男人，睇落唔似識講股票。
全世界炒得最勁嘅唔係股票，係比特幣，要冧都應該冧佢先。雖然華爾街大行話比特幣呃人，又話比特幣係Ponzi Scheme，但比特幣呢類加密貨幣，不單只唔會消失，未來只會用更先進嘅形式存在，甚至成為主流。比特幣而家嘅狀態以前從未出現過，佢係投機泡沫，等於當年鬱金香；佢同時係一種交易媒介，比特幣在某些國家可以購物，日本仲出正牌畀加密貨幣交易所，賦予加密貨幣合法地位；佢亦都係一種集資工具，可以幫發行貨幣嘅機構賣「幣花」集資。歷史上從來未有一項金融工具同時擁有3項功能，股票唔得（不能作交易），銀紙唔得（除咗政府，冇人可以印鈔集資），只有目前的加密貨幣做到。咁大威力嘅金融工具仲要係decentralised，不受任何權威控制，由人民自訂合約規管，有乜辦法唔令當權者頭痕？
而家香港成日畀人話落後，金融科技唔得創新，買餸都仲要畀現金。係唔係的起心肝要追趕先？如果係，唔係搞掂手機支付就完成任務，夠唔夠膽帶頭全球第一個地方全面開發同使用加密貨幣？如果做到第一個發行貨幣嘅地區可以轉用加密貨幣，咁就真係行先全世界，真係金融科技創新。
