《金融時報》嘅Lunch with the FT，今期輪到V神Vitalik Buterin。本報讀者唔太認識V神，佢係加密貨幣Ethereum嘅創辦人。同佢一樣20多歲嘅年輕人，主宰了整個Blockchain嘅發展，佢哋先係最有創意，唔怕什麼灰色地帶，兼且最唔滿意社會現實。Blockchain同加密貨幣顛覆了世界，佢哋最開心，全副精神跳入去大幹一番事業。V神20幾歲仔就成為億萬富豪，又可以改變世界，又可以快速致富，如果後生仔咁都唔積極投入博一鋪，蠢到加零一。
長者心態要返老還童
長者能否投入Blockchain同加密貨幣行業？有一定基礎嘅長者，有錢有人有經驗，理應比後生仔更可以將生意發揚光大。但好奇怪，而家做生意，錢係其次，你有本事做到夠大，錢自然追住你而嚟。你要嘅係第一注畀你開始搭個靚台，唔係得張白紙，之後要錢再做更大，易如反掌。全球最勁嘅ICO、集錢最多嘅ICO，係Telegram，19億美金，但Telegram係免費畀你用咗咁耐，全球通行，俄羅斯都要禁，要有如此嘅規模，先有咁大嘅集資能力。長者有本錢可以先泵錢搞靚個台，慢慢再出街搵錢。V神能夠20零歲仔就揼出加密貨幣界嘅歐羅，搞咗個平台畀全世界人發代幣，到而家開始泛濫，輪到長者出場用Blockchain嚟改進現有生意，唔再係後生仔玩晒。
長者唯一輸蝕畀後生仔嘅，係冇佢哋咁好精力，周圍飛同無時無刻都玩Telegram同Twitter。特朗普係唯一一個長者可以玩Twitter玩到出神入化。Blockchain同加密貨幣嘅世界，就係Social Media嘅世界。Social Media伴着後生仔長大，加密貨幣係由後生仔發揚光大，由佢哋推冧傳統金融行業。長者要打入佢哋嘅世界，心態上都要返老還童，同後生仔玩埋一堆。
長者千祈唔好恃住自己有錢就以為大晒，以為可以獅子撲兔，食硬班後生仔。後生仔腦筋轉得快，三扒兩撥，籌錢分分鐘多過長者份身家。你見《金融時報》都要同V神食晏，就知道家陣長者都不敢小覷後生仔。
