據報,索羅斯準備買賣加密貨幣,都唔知對市場係好消息定壞消息。一般基金係冇mandate去買呢啲唔係金融產品嘅炒賣物品,正如唔會有基金容許你去炒iPhone。而家索羅斯攞正牌去買賣,你估佢買上定買落?Trader眼中,上同落冇關係,最緊要有錢賺。但而家加密貨幣仲未係成熟嘅金融產品,要買落唔容易,沽空好困難。如果係參與買賣而想賺大錢,正路只可以揀買上,畢竟加密貨幣還是新興產品,真正令人賺大錢嘅目標可能仍未出現。所以,你見到索羅斯買加密貨幣,應該留意佢買乜,而佢買得嘅貨幣,好可能唔係响市場買,係發行商送畀佢,然後一齊炒。相信在可見將來,會有加密貨幣高調地表示索羅斯有貨。
金融人進場發揚光大
加密貨幣未來係必定會變成股票一樣嘅金融產品,可以畀類似索羅斯嘅大炒家一展身手。趁而家百廢待興嘅時候,邊個早啲入場,早啲霸定凳仔,邊個就係市場大佬。唔好忘記,加密貨幣最早參與者,都係技術人員,係佢哋寫程式寫到發咗達。當技術產品變成有投機價值,金融人進場,下一波就輪到金融人將佢哋發揚光大。
目前Trader最大嘅困難,係加密貨幣買賣唔集中,唔係某幾個交易場地能夠控制買賣。全世界任何角落都可以炒賣iPhone,大莊就唔易出現,只可以地區性有零星炒賣活動,搵唔到大錢。再者,加密貨幣交易透明度接近零,唔似股票可以知道邊個有貨,邊個買緊沽緊。加密貨幣唔單止難以作基礎分析,連技術分析都唔能夠,升跌係無路捉,唔存在技術反彈,亦見唔到平倉買盤。升同跌都難以用資訊分析,同賭錢冇分別。最成功嘅trader都開路準備投入加密貨幣市場,只可以肯定,加密貨幣市場唔會因為近期大跌而消滅,亦唔會被全球政府全面封殺。賺大錢嘅機會可能尚未出現,傳統金融人都陸續加入市場。
你唔好被大跌市嚇走,要繼續留意加密貨幣。