新冠肺炎年初席捲全城，此刻本地疫情稍為平復，本報以人物專訪系列回顧這段「疫路」。
2月3日，公立醫院醫護發起罷工、爭取本港全面封關首天，外科病房註冊護士羅卓堯（Ivan）是逾2500名參與者之一；時間倒流至1月底，主管問誰願做dirty team（抗疫小隊），他第一個舉手，3月加入，「係deliver一個message，代表某班會罷工嘅同事，真係唔係因為驚要去嗰啲地方，而去做呢件事（罷工）。」疫情或反覆，會否再加入，他二話不說：「OK啊。」
專責在隔離病房照顧懷疑或確診新冠肺炎患者的醫護隊伍，俗稱dirty team，港人由17年前的沙士認識這名字。那一役，全港有8名醫護染疫殉職。「做得呢行你預咗，點都有機會出現03年（沙士）情況，就算冇03年咁嚴重，始終有風險，冇辦法完全閃避。」沙士時仍是小學生的Ivan淡然地說。
「相對之下冇乜顧慮」
與他相約在任職4年的公院，隔離病房於主座11樓，不久前他在這裏完成6周的dirty team工作。他說其時外科病房只需要一名醫護加入dirty team，而「抽生死籤」（決定先後次序）名單已定，排首位不是他。「同事屋企有較多顧慮，例如養寵物、仔女、長期照顧老人家，好難唔返屋企。相對之下，我冇乜顧慮。」一句「冇乜顧慮」便自願接受這份高風險工作，他笑指「舉手」前沒經家人或女友同意。
27歲的他說，父母年紀不算大，任職空姐的女友又因疫情暫無法回港，惟祖母最令他放心不下，「幼稚園到小學日日放學都係佢湊我，試過成個暑假都住喺佢度，爸爸媽媽話番畀我聽，佢呢兩個月擔心到唔肯食嘢，瘦咗十幾磅。」他知道年長確診者病情往往較嚴重，唯有致電代替見面。入team後遷往酒店，他唯一一次到祖母家吃飯要採取「特別措施」──家人吃完後他才吃。
難忘照顧患者心靈
3月底正值外地回港者確診高峰，亦是他入team之時，外界當時最擔心公院系統「爆煲」；但置身隔離病房內，他反而有另一番體會。
「有個病人一見到我哋（醫護）入去就血壓好高，有white coat syndrome（白袍高血壓），要先嗌咪入去等佢有心理準備先，如果入到去仲係好高，要同佢傾吓偈，例如傾吓佢睇緊咩tv show，等佢relax啲血壓會低啲，過程中佢先share原來細個好驚入醫院。」他指因收的症剛巧多病得不重，才有空間照顧他們心靈，「好坦白講，喺一個好多人嘅急症病房，求其塞粒血壓藥畀佢搞咗佢血壓先啦。」
站在這場抗疫戰的最前線，問Ivan有何感受？他的回答大多是「冇話驚唔驚」、「冇緊張」、「平淡」。訪問尾聲記者再問一次，他透露心底話：「好多香港人會覺得『好多謝啊，好偉大』，某程度我係fulfil緊我覺得呢一行本質上需要做嘅嘢，所以我冇咁大感觸。」
本港醫護早前呼籲「I stay at work for you, you stay home for us」。Ivan不諱言至今無本地大爆發，港人的自律和防疫意識居功不淺。在這段「疫」路上，每人都有其角色；未來疫情或反覆，面對隨時再須加入dirty team，他二話不說：「OK啊。」一貫地爽快，「都係覺得係呢個行業其中一部分」。
採訪、撰文：楊嘉莉
