立法會展開新會期不足一個月,再次出現DQ風波,但今次「落刀者」由選舉主任變成人大常委及港府。因赴美就制裁交流意見而被DQ的會計界議員梁繼昌,接受本報專訪時強調,自己從不贊成制裁,認為制裁對改善局勢無效。過去基於「兄弟爬山」,為免刺激民眾而未提出相關觀點。他相信,中央對溫和泛民出手是有見國際局勢緊張,故大幅推前「紅線」以儆效尤。
人大常委會8月決定立法會全體延任,3個月後突然收緊議員資格決定,梁繼昌估計,中央今次DQ最溫和的民主派,就是要顯示他們「強勢、話事」,講明「紅線」只要觸及一次便須付上代價,「你哋全部泛民做親呢啲嘢,無論你平時點都好,你就會中招。」
訪美只為了解機制
今次DQ決定,源於今年3月訪美行程,梁繼昌就《香港民主與人權法案》與美方交流,不過他鄭重聲明「由始至終都係唔贊成制裁」,亦沒游說美方制裁本港官員。
他解釋,制裁於國際關係上根本無效,「你要sanction一個地方,受苦只係人民……我去英國讀書第一年,修讀國際關係101,其中一個大topic就係制裁。」
既然不贊成制裁,為何要應邀到美國?梁繼昌解釋,想了解制裁機制,「我係想知道究竟制裁對香港有咩負面影響,希望可以避到,咁我梗係要了解成個制裁機制點樣運作。」當時華府關注香港局勢,他於是如實相告,「佢問我『香港係咪好亂』,係,香港的確好亂,『咁係咪要解決?』係,不過唔係用高壓手段,而係用政治解決個問題。」
「冇罪證畀建制派插」
儘管梁繼昌沒要求美方落實制裁,選舉主任卻裁定他從中支持或輔助促成制裁行動,梁繼昌絕不認同此結論。「佢(美國)自己點做,其實真係佢哋選擇。」他直言,當日與美方交流時建制派亦在場,若自己曾鼓吹制裁,早就惹來建制議員抨擊,「如果我喺會度講一啲離經叛道(說話),你(建制派)咁多人要插,你咪插我、告狀囉,已經係罪證,我全程就係冇嘢畀你插嘛。」
早前全國政協常委唐英年提議,被DQ的4人可去信美國澄清立場「洗底」, 梁繼昌斷言「唔需要」,「我清楚同唐英年講,我根本冇做任何嘢,所以唔使clarify(澄清),我要澄清就係我認為制裁係唔work(不可行)。」
未闡釋觀點免刺激群眾
訪問中梁繼昌多次表明反對制裁,惟他訪美後鮮有宣揚有關觀點,他就此解畫:「你知好多朋友話(制裁)愈勁愈好,要『攬炒』,但係我冇必要講一啲嘢去刺激群眾。」他承認,溫和派無能力干涉激進派行動,「我哋係勒唔住佢哋嘅,佢哋係狂奔野馬,我哋只可以企喺度。」
梁繼昌透露,去年港府宣布暫緩修訂《逃犯條例》後,民主派曾醞釀應否先「收貨」。「你有好多機會做其他方面嘅抗爭,因為按暫緩個機制,條例都會lapse(失效),當然有人唔信啦。」
惟最後五大訴求成為共識,民主派順應民意拒絕「收貨」,「整場運動我覺得喺街頭由市民領導,唔係議會嘅代議士可以影響任何事情。」
除了不贊成制裁,示威者另一高舉口號「攬炒」又如何?他直言,要視乎定義。「香港變成第四線內地城市,冇晒活力冇外國投資,如果係咁嘅『攬炒』,我覺得係絕對不可能接受嘅『攬炒』,如果真係咁我會覺得係一種好蠢嘅『攬炒』。」
採訪、撰文:張家灝、黃展曦
攝影:何澤