出戰西貢白沙灣選區的何偉航獲得2805票，大勝對手696票，他形容參選是「刀仔鋸大樹」，是次勝利屬於所有西貢人，「當初都係諗住一半半，無諗過高票拋離，選民今次有真正嘅選擇咪出嚟投票。」身為原居民的他稱，今次當選是夢想成真，「我喺西貢土生土長，知西貢脈搏係點，可以喺我讀書地方當選，係一個夢幻時刻。」
谷選民登記 光復鄉議局
今年初曾參選村代表落敗的何偉航表示，參選區議會只是第一步，未來會推動村民登記做選民，為光復鄉議局出一分力，「當初我以為同我政見相同嘅人會投我，但原居民係跟家族投票，有啲未必仲住西貢，係遍布全港九新界，都可以入佢條村投；希望之後推動多啲人登記做選民，產生多啲『黃』嘅村長。」
何偉航分析，白沙灣選區有七成為非原居民，三成為原居民，儘管今屆年輕首投族大增，惟他承認致勝關鍵是政綱沒着墨太多政治，「就係要推動鄉郊民主，雖然政治同地區分唔開，但區議員主要心力要放喺地區。」他批評建制派對手只替政府宣傳，忽視地區工作，「有時政府派錢，佢只係貼張海報通知居民，咁樣係唔夠，區議員係要有自己計劃，推動居民參與選舉及地區工作。」
加快醫療建設起安老院
對於上任後的短期目標，他希望西貢區盡快興建安老院舍及落實醫療建設，「西貢醫療好依賴將軍澳同馬鞍山，可以睇下有咩專科門診擺喺西貢做。另外，幾年前政府已宣布西貢中心小學舊址會改劃做安老院舍，點解而家會荒廢？」
何偉航兩個多月前曾受襲，現時頭部及背部傷勢已無大礙，惟右手並未完全恢復，須定期服藥及洗傷口。他曾擔心傷勢會影響選舉工程，「白色恐怖蔓延，有時擺街站遇到啲奇怪人我都會驚，好彩而家康復進度良好，都揸到筷子、揸到車。」
2013年貨櫃碼頭爆發40天工潮，當時是工運領袖的何偉航，成功為罷工工人爭取加薪9.8%；至今相隔6年多，其角色由工人代表變為地區「保長」，惟心態依舊沒變，「我好相信集體力量，如果區議員只守住自己堡壘，唔同外面區議員合作，失敗機會好大。」他強調，未來一定會積極跟西貢區及其他鄉郊區議員交流。
從碼頭工潮、到先後加入職工盟及工黨，何偉航都離不開一個「工」字。他坦言，個人更着重公義的「公」，「係宗教信仰教我要本住公義做人，上屆立法會選舉見到李卓人輸咗，我好嬲，好唔服氣，之後就入咗工黨。」他直言，入黨絕非意氣用事，志在協助勞工階層爭取權益。
白沙灣區的碼頭工人及水上人，部分原來曾受惠當年碼頭工潮一役，自然亦成為何偉航的支持者。他笑言：「有前碼頭工人慰問我傷勢，又話叫啲兄弟投票畀我，真係幾窩心，證明愈基層的人愈有義氣，亂世中見到人性光輝真係好。」
