2015年2月2日
香港人其實除咗層樓搞唔掂之外,生活可以係幾唔錯。放假出外旅行,滑雪潛水,打牌睇戲,養尊處優咗幾十年,喺近幾年先開始知道生活唔係天跌落嚟,要苦心爭取經營。而家應該要人人都意識到,默默耕耘打份工,唔足以保你可以過世,每一日都要諗點樣同人鬥過死過,爭取生存。呢樣嘢,內地人叻過我哋幾條街,佢哋由細到大都係要打出嚟,每日唔係防止被騙,就係掉番轉,日日都係戰鬥格。
能夠喺咁嘅環境搵到錢嘅,身經百戰,肯定醒過你同我。過去十幾年,香港人學習緊點樣服侍佢哋,喺佢哋身上搵錢。嚟緊十幾年,香港人就要開始習慣點樣爭贏佢哋,攞碗飯食吓。聽落好似好慘,但係呢個世界,不嬲都係弱肉強食,適者生存,畀你嘆咗咁耐先要你捱,叫做賺咗。只不過嘆慣咗,忽然間要打,唔係個個都接受到。早啲認清楚個世界,早啲磨利把刀出外打交,就早啲可以搵番生活。
唔用腦賺內地億計票房
香港人而家仲可以拍戲發達,是少數香港人以前做開嘅老本行仲有得搞,全靠中國隨時幾億人仔嘅票房。唔止個市場夠大,個市場要求唔高先至係最可愛。你睇吓啲大陸賣座片,再比較吓啲西片。人哋西片,用12年拍一套戲又有,用大量超長鏡頭,扮一鏡直落嘅又有。呢啲超級用腦,搞盡心思,拍套前無古人嘅心機嘢,內地唔會有。
當你唔使點用腦,拍到套戲上到畫,就可以收幾億嘅話,用腦嗰個先係最唔用腦。所以話,文化事業最啱香港人做,係少數香港人老本仲可以有得食嘅事業。唔可以怪咁多合拍戲,幾億票房喎,到啲老本慢慢食完,先諗點用超長鏡頭拍番套戲都未遲。
訂戶登入
下一篇: | 大市兩連跌初轉弱 |
上一篇: | PMI弱於往年 上證今或受壓 |