2015年1月6日
叮噹配音員林保全逝世接近全城哀悼,但亞視瀕臨死亡卻冇人可憐,證明什麼值得懷念,值得保留,大家有眼睇有耳聽。
亞視的教訓是,做人做生意一樣,要靠自己,靠阿爺唔可以靠一世。仲記唔記得有一幕?亞視大晒冷,一排排國企老總出嚟撐腰,有呢班大客仔不顧一切幫襯,要做亞洲CNN有咩難度。但當引述王征所講的歷史任務完成,一切都玩完。
接管人要搵白武士救亡,過程完全唔係商業行為。續牌有危機嘅公司,續牌條件唔清唔楚嘅環境,絕對唔係一盤正常生意。最有興趣做電視嘅商人,反而最冇機會當白武士,違反正常商業行為。原有大股東被法庭要求減持股份,白武士首要揼水照顧的竟然唔係電視台,而係大股東嗰份股票,除了接受了歷史任務的白武士之外,冇人可以計得掂數。既然股東的歷史任務完結,亞視都同樣完成了歷史任務。
歷史任務搞死亞視
如果唔係有歷史任務,亞視係咪唔使搞到今時今日?歷史證明,亞視在任何一個股東手上都未試過風生水起,香港人從來都冇真正選擇。但係有歷史任務嘅亞視,更加肆無忌憚毋須提供選擇。你亂搞都可以繼續生存,有什麼動力令你認真搞?歷史任務令你死得更快,當阿爺要拔喉,你即死。
香港有好多人好多生意,都係靠插喉維持生命。一係拔喉前你已經自然死亡,你從來唔會感受到拔喉的慘況。但如果你未死已經拔喉,你就會死得好慘。
你只有兩條路揀,早死避開拔喉,或者快手開始唔靠條喉,靠自己。
亞視可能一早意識到早晚要靠自己,但係慣咗有喉餵食嘅,唔係咁易靠自己。你係時候諗吓,你而家面前嗰碗飯,係靠自己定靠人插喉。
訂戶登入
下一篇: | 留意會否連跌兩天 |
上一篇: | 玖紙受惠減息逢低吸納 |