熱門:

2014年12月15日

高仁 財圈識真假

唉賓「3傷拳」

高仁、戴Sir(戴孤劃)及程更計一起飯局,期間曾經討論到蠱惑殼主的必殺技,以及大股東押股借錢的蠱惑招數,戴Sir了解到有關財技後非常高興,就連飲幾杯紅酒落肚。

高仁見戴Sir帶有半點「醉意」,惟有一盡「豬朋狗友」的綿力,撐扶戴Sir落樓梯離開酒家,並充當「柴可夫斯基」送戴Sir回家。戴Sir在途中詢問高仁有關「唉賓」的蠱惑招數,高仁就以「唉賓」在新上市民企賺盡的例子,帶出「唉賓」招數如何導致「3傷」。在披露對話實錄之前,請各位「巴打」與「絲打」看看人物背景,簡介如下:

戴孤劃──又稱為「戴Sir」,《信報》「蠱壇辨虛實」專欄作家(高仁按:戴Sir要求賣「廣告」),上市公司大股東,經常欺壓小股東。

圍飛上市平售外人

(高仁雙手緊握軚盤,專心揸車中)

高仁:戴Sir,你覺得點呀,有冇好啲?

戴孤劃:唏!我成日上大陸傾生意,紅酒、白酒、黃酒、洋酒、統統都試過晒啦,區區幾杯紅酒落肚,邊有咁易醉!

(高仁向左瞄一瞄戴Sir)

高仁:莫非你扮「貓」?

戴孤劃:高仁……你唔係睇唔出呀!?

高仁:嘩!戴Sir你都幾好戲喎,唔做視帝真係嘥咗你。

戴孤劃:視帝?而家連亞皆老街至太子道西最受歡迎男歌手都唔吼啦,自己出去外闖好過。

高仁:我知道嘞,戴Sir扮「貓」想飛甩阿程。

戴孤劃:阿程識得咁多上市公司老闆,我費事佢知道咁多嘢周圍講啦!

高仁:原來係咁。

戴孤劃:講開又講,點解咁多上市公司掛牌就即刻插水?

高仁:其中嘅可能性係,如果公司係靠圍飛先上到市,假設上市價係3蚊,民企老闆想做得好好睇睇(上市喎,威威食雞),唔想太低價上,仍然將招股價定喺3蚊,但實際上可能係兩蚊賣畀街外人,老闆要自己交收1蚊。

戴孤劃:即係話,街外人嘅成本價只係兩蚊,兩蚊以上出貨都賺啦?

高仁:冇錯。

民企上市投行冇錢賺

戴孤劃:咁喺IPO啲「刁」到,「唉賓」會唔會都有蠱惑招?

高仁:(笑着回應)你記唔記得,我喺2011年4月「揭露『唉賓架』搵客秘技」果篇文章同埋《財圈識真假》本書講過,IPO公司同「唉賓」嘅關係,一個被視作為「產品」出售,另一個係「產品」嘅「大sales」。

戴孤劃:記得。

高仁:其實,「唉賓」最鍾意幫省市政府公司搞上市,因為官員主要都係想攞威啫,對上市定價和成本唔太關注,投行佣金就「袋袋平安」。

戴孤劃:仲有,你話投行做得第一單省市政府IPO生意,之後其他配股、M&A等嘅「翻單」仲會陸續有來。

高仁:係呀,省市政府國企啲「刁」真係好好做;相反,民企IPO就好惡啃囉。

戴孤劃:點解呢?

高仁:民企老總嘅「彈藥」(即資產)有限,心裏面一定想「吊高」來賣,但「唉賓」為求sell得出件貨,就會勸老總平啲賣。

戴孤劃:大家傾唔掂數,咁點算?

高仁:大家咪炒大鑊囉,即使勉強上到市,「唉賓」都可能冇乜肉食。

戴孤劃:「唉賓」咪隨時白做?

高仁:聽聞,有啲「唉賓」用Price Stabilization Mechanism配合Greenshoe【小檔案】出蠱惑囉。

戴孤劃:點做呀?

質低股價 低價收貨

高仁:假設隻IPO以每股3蚊上市,公開發售錄得千倍超購,包銷商就有權行使Greenshoe,係咪?

戴孤劃:係,冇錯。

高仁:唔知堅定流,聽聞喺開市競價時段,「唉賓」可以搵人去質低隻IPO個價,例如等股價跌到落去1蚊,按照Price Stabilization Mechanism,包銷商就有權維持秩序,喺market收返啲貨返嚟。

戴孤劃:「唉賓」仲買貨,要嚟仲乜嘢?

高仁:「唉賓」呢手1蚊嘅貨,當做greenshoe用嚟補返畀投資者,從中就可以食左2蚊差價。

戴孤劃:但係咁樣做,好似好「傷」喎。

高仁:「傷」,「唉賓」出呢招直頭係「3傷拳」啦!客戶「傷」,輸錢;公司「傷」,輸形象;「唉賓」「傷」,輸reputation。不過,「唉賓」為咗「B仔」(Bonus),就算係「傷」,間中都要做吓。

戴孤劃:民企老總見到IPO嗰價跌到咁,唔會同「唉賓」大興問罪之師咩?

高仁:「唉賓」唔係自己出手,梗係好似頭先戴Sir扮「貓」咁視帝上身,楚楚可憐扮晒唔知情,話就話幫老總查吓發生乜事,到頭來咪不了了之。

戴孤劃:「唉賓」同老總關係咪搞到好差?

高仁:哦,「唉賓」都會識做嘅,之後會搵自己嘅Research Team出報告,落足嘴頭唱好公司,當係補數咁囉。

戴孤劃:「唉賓」咁蠱惑,怪唔之得,我識得有啲內地老總都中招。

本欄逢周一刊出

歡迎交流上市公司的財技個案及招數,

請電郵至[email protected]

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads