2014年9月3日
天合化工(01619)畀人追擊,話佢造假。反擊第一步要做啲乜?無錯,就係立即停牌,千祈唔好畀追擊的人繼續沽,更加唔好畀佢哋補倉,停牌之後慢慢澄清慢慢搞。如果行得正企得正,澄清完後,復牌前,叫晒親戚朋友買,夾爆追擊人。
追擊後看核數師會否跳船
被人追擊之後,第一驗證指標,係睇核數師會唔會跳船。如果佢哋跳船,想復牌甚難,有排搞。你可能問,第一個跳船唔係董事咩?如果上市時候有事,董事而家跳船都冇用,點都會追番你,走都冇用。留喺公司,知道發生咩事,知道人哋問啲乜嘢,有份保險保住,好過跳船後畀人追番轉頭。
核數師呢?咁大間舖,唔通你一個人話事?唔只跳船,除時連主事的合夥人都要剁埋,斷臂止血。呢類追擊事件,近年發生唔少,輕則是報章雜誌報道,重則是幾十頁紙研究報告。有這種遭遇,通常都要求救於市場高人,當中救駕牽涉的技術及人脈,唔係公司自己本身搞得掂。
政改變成攤牌,溫和中間冇路行,部分人心灰意冷,真民主冇希望,要怪就怪香港人自己。的確係有班香港人,真心又好,假意又好,覺得人大常委決定愈睇愈可愛,並非倜侃。呢班人肯定佔權力中心的極大多數,但喺社會各階層唔一定係少數。雖然投票泛民支持者佔過半數,但冇得投票或者冇投票的人,唔一定都係泛民支持者。而且而家香港人愈溝愈淡,究竟哪一邊人多真係唔知。
你估呢班覺得人大常委決定可愛的人蠢嗎?當然唔係,佢哋不乏叻仔叻女。你估佢哋唔知香港愈來愈唔似香港?你以為佢哋生活上冇受到影響咩?一樣有,但佢哋都係有同好多人唔同嘅諗法。結論係,你生存嘅哋方,係存在唔同生物,你要問自己頂唔頂得順,頂唔順自己諗計,世界係唔會就你。
訂戶登入