2014年3月31日
坊間盛傳梁振英連任辦已經運作,當事人否認。一定否認,唔通會跟你確認?傳消息出來者不知是否存心靠害,但反而劍指2017年的各路人馬,競選辦已經開始埋班,心戰全面展開。
開始埋班的至少有兩檔,而且大家背景都近似,所以已經有人同時收到兩陣的打招呼,詢問合作意向。雖然離2017年還有3年,但鑑於上次經驗,愈早起步愈好,唔單止是候選人,連助選團都想你愈早亮劍愈好。
拉攏盟友制衡政敵
提早見光,提早讓之前唔見得光的密事盡早引爆,免得臨門一腳墮馬,受害的唔單止係候選人自己,連帶助選團都會被抄家。上次證明,落錯注的下場比泛民搞對抗更慘烈。
有條件和能力被邀請埋班的建制派人士,個個身嬌肉貴,就算點被權力鬼迷心竅,都唔會攞命同你博。所以,全部被邀人士只限於點頭考慮,一概未肯瞓身。況且大家都係朋友,無謂得罪人。
早埋班亦緣於香港來來去去得嗰幾班人,佢同你握咗手,就代表對家少了一個幫手,情形就好似踢英超聯,你買咗對方一個主力,就代表對手實力減弱,絕對是零和遊戲。況且精英圈子咁細,要知道對手有乜破綻而唔係畀對方起自己底,梗係趁早收編最好。一句話,冇鬼唔死得人。
利民舉措=收買人心?
反觀梁辦是本朝中人,有大量資源可以調動,而且對付政敵上中下路的武器多得是。外國政客標榜每天都是競選天,整個特首辦可以話同時係連任辦,何須另起爐灶?
放風的人就係想全香港幫手實,萬一有什麼民眾受落的舉動,就冠以收買人心攞票連任的罪名,呢招當年都用過喺唐唐身上,罪證是關愛基金,效果非常之好。今天重施故技,只不過對象改變了。
你睇,香港幾慘,好似操場咁畀人用嚟鬥來鬥去,搞到有本事嘅人就唔出聲,無能力嘅就爭住做。
萬一無得普選,大家仲係鬥爭阿爺的寵,到時又係買中就升官發財,買錯就滿門抄斬。
訂戶登入
下一篇: | 大市反彈由大型股帶動 |
上一篇: | 港交所雙重標準? |