熱門:

2012年10月31日

祝越山 獅子山學會

從水貨客到SSD

財政司司長曾俊華上周五宣布調整特別印花稅(SSD)措施;除了延長特別印花稅的適用年期至三年和調整稅階、稅率以外,對非本港居民和公司名義買家收取15%的買家印花稅。祝越山未有計劃買樓,難以親身想象這個SSD 2.0的威力,但周一望住地產股和美聯物業(1200)的股價一開市就勁跌,都暗暗慶幸自己早前無入市。

金管局上星期才宣布「負資產年代」告終,所有蟹貨重返家鄉!財爺馬上宣布一個SSD 2.0讓負資產復活;無他,負資產絕迹,證明樓市已經重回到九七高位,而九七樓市泡沫爆破亦的確曾令香港陷入長時間經濟衰退,要避免另一次長期衰退,打擊樓市泡沫無可厚非,最少聽落去係。

打擊外需 無礙價格

問題是,這個世界其實無人知道這個樓市升浪到底係一個泡沫、個泡有幾大,還是用家主導,直至爆嗰一刻。等於全民退休派錢計劃,不直至破產一刻,我哋都不會知道原來「唔使做,有錢收」只係南柯一夢。

雖然祝越山支持自由經濟,對SSD 2.0卻無大感覺。畢竟,獅子山學會各人一直都信自己多過信政府;買樓是靠努力工作、儲錢,不是碌爆卡、借錢、叫政府打壓樓市。

同埋財爺都係打份工搵食啫,有咁多人日日叫生叫死話買唔到(好的市區)樓,多多少少都要回應一下,無理由因為SSD 2.0就要被人狂鬧嘅。不過唔知香港政府幾時推出股市特別印花稅,好讓小市民有充足投資渠道去對沖通脹呢?

SSD推出兩年,根據往績,估計2.0都不會令樓價大幅回落;只會收窄盤源下令成交大幅減少,但乾升都係升。雖然SSD 2.0將會對非本地居民買樓帶來巨大影響,樓價不一定回落,正如SSD 1.0所證明。不過,SSD 2.0中針對非本地買家的措施,卻實在令人憂慮。

學會行政總監王弼早前形容「光復上水」反水貨客行動為香港貿易保護主義第一步,一個月後即出現SSD 2.0對付外地買家,不幸言中,往後的情況看來只會愈來愈差。

最近陳佐洱先生有關「港獨」的言論引起不少迴響、批評。祝越山雖然極不同意「香港冇咗中國會死」以及陳先生的論證方式,但不得不同意香港於資源方面極其被動,作為一個小型開放經濟體,開放係最重要的一環。

每一個土生土長的香港人,小學讀常識科時就知道香港的物資,包括食物和一切生活必需品,主要都是從外國入口。香港工業式微之後,「Made in Hong Kong」基本上絕迹,包括食物。

或者不少人都試過香港本土出產的有機蔬菜,但祝越山真係從出世到現在都未食過香港出產的米。而且即使將全個香港都變成農田,恐怕都難以養活700萬人。

我不認為香港不可以獨立存在,問題是貿易保護主義就一定不可行。

今日排外 他日後悔

自從2008年金融海嘯,世界各地不約而同地出現一股排外的浪潮,歐洲如是,新加坡如是,香港亦一樣。他們喜歡將所有的通脹歸咎於外地人;無論樓宇、洗頭水、甚至益力多都是被大陸人搶貴晒。但大陸人是否通脹的主要因素?

大陸人到香港購物並不是今日先有的事,雖然連益力多都買埋係的確有點誇張,但益力多都係入口啦?入多啲貨,做多啲生意,其實同賣益力多俾大陸人毫無抵觸;有人畀生意你做,開心都嚟唔切啦,係咪?

國際貿易本來係公平、互惠互利的事情,買賣雙方只要明碼實價,互無拖欠,你肯賣,佢肯買,就算買家唔係香港人又有咩問題?問題是,你今日選擇拒絕賣貨俾別人,難保他朝別人不會拒絕賣貨俾你。以事論事,將心比己,今日破壞個Party,他朝比人玩番轉頭,記得唔好後悔呀。

作者為獅子山學會政策研究員

[email protected]

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads