2022年3月14日
各位「巴打」,近月來國際地緣政治局勢瞬息萬變,主張和平、友誼的冬季奧運會於2月20日剛剛在北京閉幕,俄羅斯隨後卻於2月24日以武力入侵烏克蘭,觸發全球股市骨牌式下瀉。「高仁指點」話你知,金融市場有危便有機,一向先天「嗅覺」靈敏的「唉賓」(i-bank),據報擬吃一頓金融大茶飯。
戴孤劃:雖然美國一早已作出警告,但俄羅斯在北京冬奧後揮軍入侵烏克蘭,仍然對金融市場造成嚴重負面影響啊!
程更計:唉!港股短短一個月間暴跌,恒指由約25000點水平高位,最低跌至接近20000點關口,累積下瀉5000點左右,跌幅約兩成,陷入技術性熊市。我啲散戶投資者客戶,沽貨要勁蝕,唔沽貨又大壓力,所以都叫苦連天。
高 仁:冇計啦。俄羅斯一意孤行發動戰爭,美國與盟友決定對俄羅斯實施各式各樣制裁措施,金融市場都好難有運行。
戴孤劃:咱知道啊!自從俄羅斯入侵烏克蘭之後,俄羅斯金融市場因西方制裁及貿易限制而陷入動盪,俄羅斯貨幣盧布滙價暴瀉,央行實施外滙管制措施,大大提高了選擇性不支付其主權債務義務。
程更計:三大國際信貸評級機構唔敢怠慢,今次立刻take action,一口氣連降俄羅斯主權債務多個評級,意味瀕臨債務違約邊緣。
投行抄底入貨俄企債
高 仁:隨着國家主權債務評級被下調,俄羅斯企業信貸評級也難逃一劫,市場憂慮企業可能未能償還本金,甚至按時支付利息,基金及機構投資者都紛紛拋售,市場需求大幅縮減之下,令俄企債價大幅下瀉。
戴孤劃:這豈不是血流成河!?
程更計:哈哈!當金融市場充滿血腥味,嗜血兼嗅覺靈敏嘅「唉賓」,又係佢哋出動嘅時間啦!
高 仁:根據外媒報道,大型「唉賓」如「細毛巾」和「金人」都有抄底入貨,買入多家俄羅斯企業在兩年內到期的債券,包括全球最大天然氣開發企業Gazprom、鋼鐵與礦山公司Evraz及國營鐵路公司Russian Railways。
戴孤劃:(用普「東」話,即普通話+廣東話)「細毛巾」和「金人」都認為這些俄企債務沒有問題嗎?
程更計:其實,呢個只不過係華爾街長久以來嘅傳統,Trading Desks會尋找被低估或錯價嘅資產,其交易行為並不代表對呢啲資產或國家嘅看法。
高 仁:哈哈!說到底,「唉賓」都係想搵餐金融大茶飯食啫。
本欄逢周一刊出
如想與高仁交流上市公司的財技個案及招數,
請電郵至[email protected]。
訂戶登入
下一篇: | 俄烏未停火 港股續利淡 |
上一篇: | 滬深港通上周五成交統計 |