2021年1月11日
這些年,中資證券商大舉南下香港「插旗」,做「唉賓」的內地人或NDS(高仁註:內地生的普通話拼音聲母)愈來愈多,令到中環人聽「刨冬瓜」(註:普通話)多過ABC。香港國際金融中心逐漸變天,中環的追數或爆料街招也愈來愈具中國特色,其中一則更大爆了資本市場的潛規則。
高 仁:各位「巴打」,我早前喺中環交易所一帶Walk過,見到有二線中資證券商嘅男女行家被貼街招,指控佢哋係一對婚外情老千男女,真係慘慘豬咯!
過橋抽板易被唱通街
程更計:我都有見到嗰張街招,男嘅張相黑漆漆就唔評論,但聽聞之前得罪唔少人;女嘅幅相的確影得唔錯,望落去似一個美女。嘩嘩!
戴孤劃:咱知道耶!這個女的曾經出演內地電視台的節目,參加婚戀交友的真人秀節目,她的個子是蠻高大的。
高 仁:女嘅高唔高大我就唔知,我淨係知道男嘅身形唔高大,但把口勁Talk得。其實,做得「唉賓」呢行,最流行Title Inflation,一個部門隨時身邊個個都係Vice President、Assistant Vice President、Director、Assistant Director、Associate Director、Managing Director等等。
戴孤劃:「鐵哥們」,為什麼會這樣子呢?
程更計:「唉賓」出嚟同人傾Deal,唔通Title叫做部門Assistant,梗係有咁大吹咁大啦!哈哈!
高 仁:呢張街招爆咗行內一個潛規則,就係「唉賓」搵中間人撮合做成一單生意,一定要畀番中間人嘅commission、回佣或利潤分成,否則肯定畀人唱到街知巷聞。
戴孤劃:原來如此。
程更計:除此之外,呢張街招也無意之間揭露咗一個錯綜複雜嘅多角桃色關係,一眾行家都剝到一地花生。
高 仁:以婚外情老千男女形容嘅話,我估計男嘅應該係有老婆,女嘅可能係小三。
港市場成民企融資救生圈
戴孤劃:高兄,這個一定沒錯了吧!更火爆的是,這個女的原來也是另一家一線中資銀行副行級人馬的正印女友,主管DCM(Debt Capital Markets,債務資本市場)的業務。
程更計:嘩!呢個女仔嘅美人計好勁喎!
高 仁:呢一個三角關係令我諗起另一個市場潛規則,內地民企老闆喺股票市場可能做唔到融資,香港債務市場就可能成為佢哋嘅救生圈。
程更計:男「唉賓」作為DCM嘅主管,要幫公司爭取民企發債嘅大生意,佢會唔會自己輸送利益「利誘」老闆,抑或利用小三幫忙「色誘」老闆,呢樣就不得而知咯!
戴孤劃:呵呵!你懂的!
本欄逢周一刊出
如想與高仁交流上市公司的財技個案及招數,請電郵至 [email protected]。
放大圖片 / 顯示原圖
訂戶登入
下一篇: | 通脹衍生風險不容忽視 |
上一篇: | 「立往生」 |