熱門:

2020年6月29日

高仁 財圈識真假

全球CEO大比併

各位「巴打」與「絲打」,高仁講過股市要長升長有,良好的企業管治必定不可或缺,上市公司董事擔當了一個非常重要的角色,故此之前對本港上市公司的董事進行了大比併。本文,高仁與「豬朋狗友」決定會放眼全世界,但只集中探討上市公司最重要揸fit人,就是多個國家股市上市公司聘請CEO的大趨勢。

施友化:我較早前收到一家國際獵頭公司嘅研究報告,佢統計咗全球16個國家主要指數嘅上市公司900多位CEO背景資料,相信值得作為大股東嘅戴Sir參考。

戴孤劃:好的!快一點說吧!

高 仁:我都有睇過呢份report,等我都幫施兄手講下。先講年齡,呢批CEO嘅平均年齡約56歲,最老嘅CEO來自美國,足足有89歲,勁呢!所以,我之前話自己年紀仍然處於當打之年,真係一啲都冇講錯。哈哈!

施友化:上市公司聘請呢批CEO嗰時平均年齡係50歲,最大係美國嘅平均53歲,最細係挪威嘅平均46歲。不過,當中有21%嘅CEO喺45歲以下嗰陣已經上任。

戴孤劃:當這個首席執行官(內地對CEO的稱呼),太年輕的不行,太老的也不行!這也很合理吧!那是男的多,還是女的多?

高 仁:CEO職位主要由男性主導,統計之中只有5%係女性。挪威女性CEO佔比最高,達到16%。一如所料,中國係傳統重男輕女嘅國家,女性CEO佔比最低,只有1%。

施友化:呢批CEO平均任期為6年左右,最長任期係比利時平均9年,最短任期係包括中國、丹麥、瑞典同瑞士嘅CEO嘅平均4年。

76%曾擔任CFO或COO

戴孤劃:首席執行官做得不好,要落馬也沒有不對!

高 仁:戴Sir講得啱,而家上市公司對CEO嘅要求愈嚟愈高,好多CEO都會有C-suite經驗。

戴孤劃:什麼是C-suite(高仁按:讀音為C-sweet)?

施友化:C-suite即係CEO(行政總裁)、CFO(財務總監)同COO(營運總監)囉!

高 仁:根據調查顯示,呢批CEO中嘅76%之前係有C-suite經驗,其中39%做過CEO、18%做過CFO、21%做過COO。

施友化:冇錯。而家上市公司對有C-suite經驗嘅CEO需求較大,78%嘅新聘任CEO都有C-suite經驗;當中,對擁有CFO經驗嘅需求亦不斷增加,22%嘅新聘任CEO係有CFO經驗。

高 仁:無他嘅,隨着社會不斷演變,而家做CEO同以前已經好唔同,幾乎要識晒十八般武藝。除咗要履行管理職責、維持日常營運同對股東負責之外,新一代嘅CEO仲要兼顧其他新任務,例如開拓數碼業務、關注環境問題、與不同嘅利益團體保持良好關係,以及讓公司長期可持續發展等……

戴孤劃:怪不得要請一個好的首席執行官都變難了。

本欄逢周一刊出

如想與高仁交流上市公司的財技個案及招數,請電郵至[email protected]

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads