熱門:

2020年1月20日

高仁 財圈識真假

查究Big 4「數佬」狠分手秘因

各位「巴打」相信都知道,一般打工仔會有一個習慣,無論工作如何辛苦,也會捱至新一年才遞交辭職信,務求「B仔」(bonus,花紅)袋袋平安,才跟舊東家講bye bye。

惟高仁發現,會計界四大「數佬」之一(哈哈!核數師的俗稱)相當狠心,選擇在年尾流流及新年之初辭任超過20名「客仔」(註:客戶,上市公司)獨立核數師職位,遂決定與「豬朋狗友」一起查究「數佬」狠分手背後原因。

沈繼司:高仁,我哋上一次解構完中小「數佬」生存秘技之後,我發現到最近的確多咗中小「數佬」接上市公司嘅job。

高 仁:但你哋又有冇發現到,全球會計界Big 4之一嘅Deloitte(德勤)近兩個月好狠心咁辭任咗23家本港上市公司independent auditor嘅post呢【表】?

施友化:嘩嘩!聽落數目都唔少喎,真係手起刀落,但佢交代嘅辭任原因係乜嘢先?

沈繼司:佢都係用「數佬」辭職原因「三寶」(高仁註:哈哈!並非澳洲「三寶」烏蠅、肥婆、醉酒佬),一係未能夠與公司就審核費用達成共識,二係考慮到與核數相關嘅專業風險,三係目前工作流程中嘅可用內部資源不足。

高 仁:哈哈!呢「三寶」都係門面解釋,畀人既大方又得體嘅感覺。

施友化:Big 4之中,Deloitte接細公司嘅job相對較多,細公司畀嘅audit fee比較少,出事機會卻大得多,即係所謂嘅錢少風險大。

沈繼司:講得冇錯。而家財務匯報局已開始運作,「數佬」核數出事有可能會罰得好重,梗係無謂搵命博啦!

高 仁:各位「巴打」,雖然有可能係咁,但我哋都要進一步睇返Deloitte請辭之前,對呢啲上市公司財務報告畀咗乜嘅審核意見,再深入查究兩者分手嘅可能原因。

施友化:冇錯。Auditor畀公司嘅意見,最好一定係「無保留意見」(unqualified opinion),代表公司嘅財務報告能夠真實而公平(true and fair)地反映狀況;相反,如果畀「保留意見」(qualified opinion)中嘅4個類別,包括:(一)帶強調事項段無保留意見;(二)拒絕表示意見;(三)負面意見;(四)局部嘅保留意見,都反映公司嘅狀況可能存在隱患。

沈繼司:根據資料顯示,Deloitte畀絕大部分公司嘅意見都係clean report,好似只有一間公司係畀qualified opinion。

施友化:另外,有7家公司之後委聘嘅接任人,竟然係Big 4嘅「水記」、「K仔」同EY,不排除審核費用差不多之餘,甚至乎會有增無減。

高 仁:我亦都聽到會計界「巴打」話,今次Deloitte所以咁狠心同多間公司分手,可能源自於收緊咗內部compliance(合規),限制合夥人跟進上市公司嘅數目,期望可以提升審計嘅質素。

沈繼司:所以,合夥人惟有放棄一啲雞肋客仔,辭去一啲細公司嘅auditor職位,留返一啲大公司嘅肥美accounts。哦!原來如此。

本欄逢周一刊出

如想與高仁交流上市公司的財技個案及招數,請電郵至 [email protected]

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads