熱門:

2019年11月1日

畢老林 投資者日記

帶着矛盾去投資

10月31日,周四。有套粵語殘片,戲名毫無印象,大概記得梁醒波做主角,扮演一個儍仔,娶了一個醒目老婆。儍仔初初擺檔賣報紙,遇上大風,吹走晒,老婆就教,下次用石頭壓住就OK。後來儍仔改賣雞蛋,再次遇上大風,立刻用同一招,當堂全軍覆沒。投資書,不可能似烹飪書一樣,教你如何選擇最佳食材,何時落鑊,炒幾多分鐘就剛好熟。投資法則,沒有絕對,不少更其實互相矛盾,甚至相反。投資法則,用在不同投資對象,不同市況,何時做,如何做,效果可以相差極遠,就算完全相反亦司空見慣。

有錢唔係大晒

最簡單,投資金科玉律,Buy Low Sell High,但到Jesse Livermore等趁勢為上的動力投資派手上,卻主張唔破高位唔買,因為只有升得勁,才證實有足夠氣勢與馬力。低買高賣對,但高買更高賣亦對。索羅斯可以一邊感覺市場遲早出事,一邊繼續bullish,因為即使超買,甚至股價大幅遠離基礎價值,不等於一定會大跌,高估值,不等於不能維持一段長時間。

又例如Cash is king。如果市場大跌,別人流血你大把資金,可以斯斯然入市,這個時候有錢大晒,真係好似做大帝。但如果股市大平賣,你淨係識攬住堆錢,慌死股災有排捱,資金無法發揮作用,完全談不上king唔king。到市場已經開始穩定,經濟好轉訊號相繼出現,部分公司已經搶先跑出,指數亦開始有突破之勢,如果你依然攬住舊錢發呆,任由通脹宰割,任筆錢隨時間貶值,死揸cash完全唔係king,係豬頭炳。

瑞典草根股神Lennart Israelsson分享成功秘訣時,特別強調自己屬於樂天派,深信股市如何大跌,都一定升得番,其經驗亦證明每次股市都會翻生,所以跌市草根股神絕對唔會賣,甚至趁跌市加碼。

似安全實危險

能夠在股市生存70多年,將身家發到過億港元,Israelsson就靠上述投資心法。方法固然好,但大前提你必須選對投資對象。經濟復甦,亦不代表所有公司都會一齊復甦,好公司,不但復甦,而且會變得更強大,經過一個一個周期,新高再新高。不過亦有不少公司,由熊市跌到牛市。就算買指數,如果應用到日股,或者內地股市,就只能祝福你,吉人天相。

要買得平,要有安全邊際,對。但又平又靚,十年難逢一次,其他情況,平嘢通常冇好。特別是如果公司平,可能因為毫無前景,新投資回報低,又為公司帶來太大財務負擔,這種平,無法帶來安全邊際,業務惡化的潛在危機,只會令未來更加不安全。

增長股好,對。但增長都有好多類型。某些公司(例如國內不少汽車公司),一時爆發性增長,但一兩年後突然完全停止增長,甚至倒退,玩死你。新經濟公司,生意額增長驚人,但燒錢更加驚人,這類增長,有時候市場受,P⁄E多多倍都唔拘。但轉頭,市場可能開始厭棄,完全失去興趣,或者見慣高增長,稍微低一兩個點都立刻失望。見到增長就撞個頭埋去,結果視乎你好彩唔好彩。

投資無法則

自相矛盾,沒有法則,講求應變,就是投資法則。招式來來去去幾樣,但何時用,如何用,只能靠不斷摸索以及嘗試,自己領悟出如何因地制宜,見招拆招。投資遊戲容易玩,就唔會難倒大多數人。

 

 

(編者按:畢老林最新著作《我的投資日記》現已發售)

歡迎訂購:實體書、電子書

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads