熱門:

2019年10月21日

高仁 財圈識真假

解構上市公司被DQ爭議

各位「巴打」,本港反修例運動持續超過4個月,事件至今仍未有平息跡象,新一屆區議會選舉將於11月底舉行,參選人會否因政見或言論等原因被DQ(取消資格),相信勢將成為焦點所在。

「高仁指點」話你知,港交所(00388)早前建議對一家上市公司DQ(除牌),但遭對方大肆抨擊DQ程序不公平且不公正,引發高仁與「豬朋狗友」一起解構該宗DQ爭議事件。

高 仁:我哋上一次先話,港交所建議「停賽」新規則,事先做好諮詢聽取市場意見,總結後作出若干改動才實施,讚佢嘅手法夠高明。點知港交所早前建議對一家上市公司DQ,不但激到對方主席好似生蝦咁跳,甚至喺記者會上拍枱怒罵!

戴孤劃:這是什麼一回事呢?

施友化:我知道,呢一家係2016年8月被證監會勒令停牌嘅公司,港交所喺2018年7月向公司開出復牌條件,包括刊發所有未公布嘅財務業績,以及證明公司已實施足夠內部監控制度。

高 仁:冇錯。公司今年6月同7月先後向港交所提交復牌建議,聲稱已充分滿足所有先決條件,港交所卻提出「足夠業務運作」嘅新附加復牌條件,公司認為先決條件同除牌應分開處理,上市部未與公司進一步溝通之下,8月底建議上市委員會取消公司嘅上市地位。

戴孤劃:這也太狠了吧!

港交所指新除牌程序經諮詢

施友化:未算。公司更加不滿嘅係,上市委員會拒絕公司出席上市委員會聆訊及作出陳述,但同時允許上市部出席聆訊及主張取消公司上市地位,認為係剝奪咗公司喺聆訊中抗辯嘅機會。

高 仁:所以,公司之後喺《信報》刊登頭版廣告,以十行詩【表】控訴上市部同上市委員會濫用權力,指摘取消公司上市地位聆訊嘅處理方式不公平且不公正,並聲稱已成立「聯交所濫權關注組」,招募其他受害上市公司一齊維權。

戴孤劃:我很明白董事長生氣的原因,公司為了尋求復牌大費周章,可能已經花上好幾千萬元,最終卻要面臨被DQ的命運。哀哉!哀哉!

施友化:雖然港交所拒絕評論個別個案,但就強調去年8月生效嘅新除牌程序係經過廣泛市場諮詢而作出嘅修訂,並得到證監會批准。有關嘅除牌程序亦係公平同透明嘅。

高 仁:根據從事corp fin嘅「巴打」話,上市委員會一般只會喺有需要嘅時候,先會容許上市公司或顧問代表喺聆訊上陳述,以及喺上市委員會有決定後,才會畀上市公司提出覆核。

公司可透過覆核委員會上訴

戴孤劃:聽說公司正尋求司法覆核的可能性。

施友化:個人意見認為,公司暫時冇需要行到JR(司法覆核)嘅最後一步,原因係整個DQ程序仲未完成,即係並非已經判咗死刑,公司仍可以透過覆核委員會上訴同答辯。

高 仁:無論如何,港交所實施新DQ程序嘅目的,相信都係為咗維持香港股票市場嘅質素同信譽;不過,港交所執行有關上市規則嘅時候,一定要嚴格跟隨既定準則辦事,否則便難以服眾。

戴孤劃:高仁,你說得真好!

本欄逢周一刊出

如想與高仁交流上市公司的財技個案及招數,請電郵至[email protected]

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads