2019年10月4日
10月3日,周四。早兩日提及口痕友講美國經濟衰退,打比喻一樓跳窗唔死得人。話口未完,美國9月份ISM製造業採購經理指數跌至47.8,10年最差,拖累道指兩個交易日挫逾800點。衰開有條路,有「小非農」之稱的ADP私營部門職位亦錄得三個月來最低增長。
老畢覺得,稱ADP為「小非農」有點過譽。很多時候,ADP職位增長跟美國勞工部發表的正牌非農業新增職位相關性並非想像般高,根據「小非農」揣測「大非農」,諗住入市炒番轉,分分鐘買大開細買細開大。不過,市場此刻擔心衰退,但凡經濟數據差過預期,股市就有藉口炒落。
輸少好多冤枉錢
回看製造業,今時今日對發達經濟體貢獻已大降,以美國為例,佔GDP僅10%左右。這不等於說製造業不重要,只是對GDP貢獻遠不如服務業、每單位產出不需要那麼多勞動力而已。這跟農業今天在經濟中佔比微不足道、農民佔整體就業人口比例極低,但不代表這個年代的人「唔使食」,道理一樣。
製造業採購經理指數話就話係經濟領先指標,但長遠而言似噪音多過訊號,過去10年如果獨沽一味留意美國消費者動態,可能輸少好多冤枉錢。
中美貿戰無疑令環球製造業雪上加霜,惟開打至今只有一年多,製造業陷困卻早非今日始,當中既有半導體周期見頂、中國經濟放緩、汽車業(尤其德國)不景,原因不一而足,加埋保護主義抬頭,製造業衰多兩錢何奇之有?市場所以對近日公布的數據如此敏感,多半非因製造業本身,而是擔心消費、就業終受拖累,經濟逐漸步入衰退。美國接着就要公布9月份ISM服務業指數及非農業新增職位,又睇吓驚喜定驚嚇。
過去一兩個月,市場最關心的是中美貿易戰。唔使睇其他,沙地阿拉伯石油設施遇襲,全球原油供應一瞬間每天損失近600萬桶、美國貨幣市場大鬧錢荒,對美股的即時衝擊加起來都唔及中國副部長級官員訪美臨時取消農業區行程,就知個市對貿戰反應有幾神經質。明知侵侵一時一樣,今日喺聯合國大講中國壞話,聽日便說中美貿易協議可期更快達成。
慣性思覺失調
這傢伙慣性思覺失調,投資者卻恍如中邪般陪佢癲,侵侵噏乜就信乜。近期市場焦點還多了一個衰退憂慮,美股9月個頂低過7月個頂,投資者趁高沽多過趁低買,話差雖然唔算好差,但氣氛認真麻麻。
諗番轉頭你會發現,現在跟年初大不相同。聯儲局今年減息兩次,美股跟住就跌;再看年初,單是減息預期已足夠令美股一口氣升足四個月,其他因素係龍係蟲話之你。聯儲局其實沒有市場想像般鴿,早前炒減息有點炒過龍。這陣子市場聚焦疲弱經濟數據,減息預期又見升溫,股民會否再度視bad news為good news,足以決定美股第四季去向。暫時睇嚟,壞消息就係壞消息,觀望為上。
勿一本通書睇到老
執筆一刻,金價重上1510美元水平。金市與美滙理論上反向而行,但兩者於避險情緒升溫時都有條件吸引資金流入,同上同落並唔出奇。問題是,投資者因乜而驚並無標準,同是避險資產,美元和黃金對不同事件的反應可以好唔同。舉個例,美國對華施壓由貿易擴散至金融領域,金價反應就明顯遜於美滙,早前更失守千五美元,個勢好似唔多掂。經濟數據疲弱,金價反應卻比我想像正面,美金則升升吓都會軟番落嚟,某程度又回復逆向。此所以,相關性並非鐵板一塊,不可以一本通書睇到老。
(編者按:畢老林最新著作《我的投資日記》現已發售)
歡迎訂購:實體書、電子書
放大圖片 / 顯示原圖 放大圖片 / 顯示原圖
訂戶登入
下一篇: | 高鑫融入阿里生態 蓄勢上衝11元 |
上一篇: | 香港股市上日收市統計 |