2019年9月30日
證監會(SFC)早於今年4月就孖展借貸業務(Margin Financing)新指引發表諮詢總結,並訂於10月4日,即係本周五開始實施《證券保證金融資活動指引》。上周一本港九大證券組織與金融服務界議員張華峰再跟SFC開會,建議押後實施日期。不過你有你建議,佢有佢實施,SFC無意押後,鐵定喺10月4日如期推行,但就話會喺實施初期酌情處理。
只不過所謂酌情權,其實係未有明確指引點運用,一般嚟講賓架都係一頭黑人問號,為免因為踩中地雷而被要求暫停營運,當然要按計劃喺10月4日開始執行新指令。由於呢個指引早於4月已知道要執行,其實呢幾個月,唔少「卜架」已着手收緊孖展去槓桿,尤其近呢兩三個禮拜,愈接近本周五死線,就日日都見到有三四線股仔出現高台跳水現象。卜架行為求自保,索性斬腳趾避沙蟲,勸客戶沽出細價股或唔借一分一毫孖展畀相關股仔。
睇番過去個幾兩星期嘅跌幅榜冠亞季軍,跌幅閒閒地三成以上,甚至出現七八成單日跌幅,呢啲都係因為個別券商為咗合乎新孖展指引,要求旗下客戶補孖展不果,唯有將客戶持貨減磅,而呢啲股仔好多時因為成交疏落,只要有略為大些少數量,股價就好易出現斷崖式下跌。
免佣C組經紀影響大
再仔細研究下新孖展指引,當中涉及券商借出孖展的總額為其資本5倍,即孖展貸款額「封頂」,呢樣嘢係直接同shareholder fund掛鈎,即係券商資本夠厚的話,孖展生意當然唔受影響。但若然股東資本唔夠厚,即使符合財政資源規定(FRR)嘅速動資金要求,孖展借大咗一樣犯規。
呢項新指引對於以孖展業務為主要收入嘅中小型C組經紀嚟講,可以話係辣招一項,皆因想繼續目前規模嘅孖展生意,就要股東注入資本,揼大個shareholder fund,否則唯有將目前嘅孖展借貸額縮水,變相要減低部分孖展生意額。
其實自從最低佣金撤銷,以及網上交易系統普及之後,券商為咗搶佔市場份額,相繼減佣迎戰,股票交易佣金愈減愈狼,有卜架推出零佣,甚至一世免佣交易,唔少卜架的佣金收入已愈來愈少。而呢類平佣甚至免佣卜架,就依賴孖展生意嘅利息收入。先唔講中小型卜架嘅利息收入佔比幾大,屬於中至大型本地券商耀才(01428),2018年中期業績顯示,其孖展融資利息收入佔總收入約四成,新指引實施後,對孖展利息收入難免有負面影響。
而今次嘅孖展新指引,另一方面係針對「關連證券抵押品」帶嚟集中風險;其實點為之關連證券雖有定義,但最終決定都係要由券商自己進行評估,呢樣嘢實在可圈可點,最終又係交番個波畀卜架行自己決定。其實孖展借多借少,一般卜架都有內部指引,個別股票嘅質素先係關鍵。新措施對於中小型券商影響較大,主要係因為資本金上限影響,難以擴大生意,扼殺中小型卜架生存空間。
港股成交額加快縮水
如果中小型券商無法透過孖展融資做大盤生意,變相令整體成交額下降,而港股踏入今年以嚟,喺外憂內患嘅情況下,成交額已愈見縮水,呢個時候執行新指引,恐怕進一步加劇港股成交縮水嘅速度。而近半年已愈嚟愈多卜架行唔再借出孖展,尤其係細價股更一蚊不借,令本已一潭死水嘅細價股市場雪上加霜。
麥狄文(徐狄怡.證監會持牌人)
訂戶登入
下一篇: | 從足球博彩看股市 掌握5分鐘機遇 |
上一篇: | 識破瞞騙金融機構融資手法 |