熱門:

2019年9月23日

麥狄文 金融街密語

未見白色恐怖 先見自我審查

近來收到唔少金融圈行家,又或者以前做傳媒時嘅行家的關心問候,當中唔少已經無聯絡一段時間,卻不約而同透過訊息或電話向我溫馨提示,內容都離唔開同一個話題,都係關於阿Man喺社交媒體平台發表嘅言論涉及近日社會運動,怕唔怕言論內容較為敏感,可能影響工作,甚至惹來不同政見人士「篤灰」,搞到飯碗不保。

其實,自從某航空公司有旗下員工因為參與社會運動,又或喺社交平台發表相關言論而被公司辭退後,白色恐怖已蔓延開去,更有公司內部文件及通告外涉,內容係有關修訂「code of conducts」,當中較惹人爭議係公司竟鼓勵同事「篤灰」,呢個消息一出,令市場嘩然。對於個別公司嘅做法,阿Man不予置評,始終每間公司有自己一套行事作風,打工仔食得鹹魚抵得渴,公司嘅守則當然要遵從。

港金融圈逐漸染紅

至於一眾好心人關心阿Man,感動之餘亦不禁悲從中來,何以香港一個曾被譽為全球最自由嘅城市之一嘅地方,竟然會因為喺社交平台發表個人意見,而會有朋友行家擔心我前途。好老實,已持續咗超過3個月嘅社會運動,當然唔多唔少影響到各行各業嘅正常運作,而金融圈喺呢一段時間,又確係少咗企業融資活動,最明顯當然係IPO數目明顯較去年減少,而其他企業活動亦同時靜咗落嚟。

不過,所謂嘅白色恐怖現象,未見喺呢個圈子有好明顯出現,至少阿Man就未有聽聞有行家因為呢個問題丟飯碗。至少喺外資公司未見有呢個情況發生,好似會計界嘅BIG 4,喺較早期嘅大型活動發生期間,都只係以員工安全為最重要考慮,作彈性上班或work from home嘅工作安排,從未見有公司阻撓員工參與任何遊行集會。當然,對於任何犯法行為,阿Man同意任何公司對員工都係零容忍態度,不過遊行集會及言論自由,係《基本法》賦予香港居民嘅基本權利,只要係合法行為,一般公司都唔會干涉員工喺工作以外時間嘅行為。

只係眾所周知,近10年香港金融圈已逐步染紅,行一轉中環操普通話嘅金融人多過講英語嘅外籍人士及講廣東話嘅本地薑。據聞今次社會運動,中資機構雖未有大鑼大鼓阻止旗下員工參與任何運動,但溫馨提示確有唔少。阿Man曾經收到風,有中資機構「唔建議」員工喺周五dress down day(一般金融人喺周五,除非要出席會議或見客,好多公司都可以着便服)着黑色衫,而戴口罩則可免則免,病咗唔該請病假留家中,唔好戴口罩返工;甚至係非落雨嘅日子,唔好帶雨遮……連遮都唔好帶呢吓,阿Man聽完有啲儍咗眼。

雖然呢啲溫馨提示實在唔算係乜嘢白色恐怖,但有個別較敏感嘅中資機構員工,自動alert,開始審視自己嘅社交平台,把曾發表過較為敏感嘅言論刪除,更甚有稍具知名度嘅評論員把社交平台封閉暫停,一了百了,可見未有白色恐怖,已見自我審查。

麥狄文(徐狄怡.證監會持牌人)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads