2019年9月5日
港股忽然大挾倉,恒指昨日高開147點,至25675點,呢個已經係全日低位,午後兩點如火箭升空,15分鐘內扯高逾600點,尾市最高抽上26654點,狂飆1126點,收市報26523點,大升995點。形態上恒指唔止突破三角形,仲升破頭肩底頸線,看來好大機會全數回補8月5日的下跌裂口(26502至26868點)。
撤回修例 大市急飆
特首林鄭讓步回應5大訴求,當中正式撤回逃犯修例。超過兩個月的社會暴亂,是壓在港股頭上的一座大山,如果矛盾能夠化解,社會回復祥和,股市大幅回升十分合理。
問題係林鄭即使讓步,讓幾多?人家收唔收貨?都係未知數。退一步雖或海闊天空,但如果呢個退係「進退失據」的退,亦可能跌落萬丈深淵,筆者暫時唔敢太樂觀。
隔晚美股下挫,美國8月份ISM製造業PMI跌至49.1,是3個來首次跌破50盛衰分界。雖然如此,數據愈墜落,聯儲局愈有機會減息,甚至會大手行動。按聯邦基金利率期貨反映,交易員估計本月減息1/4厘的機會高達九成,而減息半厘的機會則由零升至約一成。
事實上,美國市場利率(債券孳息)已遠低於官方利率(聯邦基金利率),儲局好難唔減息。
減息利好地產股
減息利好地產股表現,昨日地產股出現異動,下午早段買入恒地(00012)Call,9月份37元行使價,買入價0.82元,點知唔夠一個鐘大升至1.9元,大升131%,梗係食糊啦,其後最高升到2.2元,唔恨得咁多。
Long中恒地Call運氣居多,地產股大升,未必係炒減息,而係炒修例風波有轉機。兩個幾月的衝突,令到樓市死寂,商場拍烏蠅,發展商同收租股都受到好大影響,市場上累積淡倉唔少,所以林鄭讓步傳聞一出,即出現挾淡大行動。
技術上恒地同新地(00016)都係雙底,不過都升近頸線阻力。收租股希慎(00014)高低腳,頸線在35.45元,仲有約9%水位,不過呢隻冇期權,買正股本錢較多,風險亦較大。記住係博反彈,輸贏都要快計數。
訂戶登入
下一篇: | 買美股的理由 |
上一篇: | 風險上升不等於危機將至 |