2019年8月20日
8月19日,周一。曾經講過,單憑印象好,絕非投資一家公司的好理由。因為用過某某公司產品覺得幾好,因為公司老闆名氣大,因為見到企業出現在某某重要排行榜上,或者見到某某店舖生意旺,心中留下良好印象,所以發生投資興趣,這個邏輯有時候對,但也可以非常危險。冇錯,上面種種途徑,都可能引領你發現有趣投資對象。不過,有個好印象,頂多只是認識一家公司的第一步。是否值得投資,未從營運及財務角度認真審視過無法得知。
單憑印象信唔過
首先,產品好,不代表股票好。不妨從相反角度想想,如果你對公司產品毫無興趣,是否代表公司缺乏投資價值?答案當然是否定。你唔喜歡,可能大把人喜歡。所以個人喜好,只能稍作參考,對判定產品以及公司前景,幫助不大。更加重要的是,一間公司產品多籮籮,就算某件產品令你印象深刻,而且確實賣得滿堂紅,對整間公司來講,重要性有幾大,未仔細查證,無法確定。
好似在下,對3M產品就非常滿意。從膠紙到紗布,冷氣機隔塵網到無痕掛物鈎,全部用過,雖然比較貴,但確係比較質素高。又買過一件人造羽絨,裏頭用一種3M物料,效果亦唔錯。曾經因此走去研究間公司。唔睇猶自可,一睇嚇壞我。其實3M產品幾萬種咁多,日常生活接觸到的僅屬小部分。而近來,幾個主力部門生意都麻麻。3M好多產品同汽車業與電子業有關。上半年,尤其是前者,無論中國汽車業也好,環球汽車業也好,都經營困難,紛紛要去存貨,3M自然受影響。最新第二季業績,四大部門,只有健康護理產品有增長,其他全部負數,包括大家最經常接觸到的消費者產品。
另外,沒有特別留意公司消息,未必知道3M一直被環保訴訟困擾。CEO Michael Roman業績會上亦特別提到,雖然3M 2000年代初期已經停止用PFAS這類問題化學品,但各地一大堆訴訟案,未來有排煩,要拖到幾時才徹底解決,佢都冇把握講實。PFAS包括4000多種化學品,曾經廣泛被應用,無法自然分解,對人體有害,美國各地都發現相關水源污染個案。
股價走勢落後大市,部分因為業績倒退(上半年銷售額微跌,盈利萎縮大概兩成),部分亦因為這個棘手問題。單憑你枱面的3M post it,或者廚房塊3M紗布,冇可能知道公司其他方面有幾多濕滯嘢,麻煩多多。3M品牌的確家喻戶曉,但有好多經營細節,單單望個品牌你唔會曉。
老闆人氣不可恃
老闆人氣一樣信唔過。鴻海老闆郭台銘,在電子工業界影響力,無遠弗屆,先前更宣布參選總統殺入台灣政壇,影響力無人能否認。然而,公司股價表現認真麻麻,近年一直拾級而下。就算唔同2007年高位200元新台幣樓上比,就與兩三年前高位(100元新台幣左右)比較,已經下跌4成。
作為蘋果最大代工,蘋果好景,鴻海雖然有得益,但利錢遠遠不及。蘋果產品增長停滯,可以開拓服務收入彌補,鴻海卻比蘋果頭痕得多。集團旗下另一公司工業富聯,去年內地上市,當時好好氣勢,如果未曾追貨,反而避過一劫。上市一年,股價反覆偏軟,現價大概15元人民幣,最低試過高位折半。
基於老闆風頭勁,因為企業名氣大,所以對公司充滿幻想盲目投資,唔好制。鴻海與工業富聯,未來前景怎樣,投資價值如何,在下未曾深入研究,建議自然沒有,但如果你想投資,就要先做好功課,不能衝着郭老闆就貿然落注。
上榜不代表好投資
排行榜,好多時不過攞嚟講。IBM曾經多次出現在麻省理工聰明公司榜TR50。話就話上網公司代表創新技術與有效商業模式完美結合,但IBM卻一直無法趕上互聯網時代。雲端服務又被其他幾個年輕科技巨頭後發先至,現在市場份額都唔知排到第幾。成功收購Red Hat後,是否能夠大反擊,有待觀察。十大乜乜公司,五十大乜乜公司,五百大乜乜公司,參考一下可以,但上榜並不代表好嘢。每個榜,選擇方式以及排名辦法都不同,但通常並非按投資價值。
印象問題多籮籮,可能太過片面,可能已經過時,一概不靠譜。
(編者按:畢老林最新著作《我的投資日記》現已發售)
歡迎訂購:實體書、電子書
放大圖片 / 顯示原圖
訂戶登入
下一篇: | 國產化需時 芯片業未出谷底 |
上一篇: | 香港股市上日收市統計 |