熱門:

2019年5月21日

尹德政 政觀其辯

炒賣謹記跟潮流

中美貿易戰愈玩愈激!由美國突然向中國貨徵收25%關稅,之後中國上周一「還拖」,最新演變成打科技戰,拉埋谷歌(Google)同美國晶片商落水,總之就係要整冧華為先會罷休,港股想勁彈其實都難。

高追中芯易坐艇

市場有時好奇怪,華府唔畀美國晶片商賣產品予中國,投資者條件反射認為可轉用國產晶片代替,令中芯(00981)昨天曾炒高9.8%,高見8.82元,收市仍飆8%,成交金額大增至7億元,比過去20日平均2.3億元多兩倍。

講真北水唔係儍,中芯上日就錄得淨沽1.1億元,因大家見到季績已冇癮,在首季全球經濟回穩下,中芯同期純利仍倒退58%,加上與全球最頂尖如台積電、三星同英特爾技術有一大段距離,例如中芯今年先開始量產14納米晶片,但台積電已量產7納米,明年首季更進軍6納米,明顯中芯要取代台積電時辰未到。

另外,中芯估值離地,市場預期今年預測市盈率(P⁄E)達78.7倍,較行業一哥台積電預期今年P⁄E18.2倍高一大截。短炒中芯冇所謂,但長揸坐艇風險高。

唔肯落車易中伏

炒股要跟潮流走,只識上車唔肯落車就好易中伏。例如2000年十大市值股份【表】有3間公司主營電訊,當年唔買電訊股就呻笨;而家揸住中移動(00941)博變增長股,十個有九個半都耍手擰頭。

又好似2010年,正值資源股當紅炸子雞的年代,全球十大最威水股中,資源類霸佔四席,分別有中石油(00857)、埃克森美孚、必和必拓同巴西石油,不過,剎那光輝唔代表永恒,若由2010年揸住中石油至噚日又唔止蝕一定灰爆,因為股價累跌51%。

時移世易,今期流行新經濟股,資源股唔啱市場胃口,全球十大市值股王又大執位,十間有七間屬新經濟股,亦與2010年國企獨當一面好唔同,而家全部都是民企股。

當然,科技股唔係無敵,電動車生產商Tesla(NASDAQ︰TSLA)就係樣辦,受市場關注資金情況同自燃事件影響,股價近期持續向下。所以上車之餘,記得肯落車,才是投資王道。

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads