熱門:

2019年5月20日

麥狄文 金融街密語

星星之火可以燎原 森林迷陣疑涉騙財

阿Man唔止一次表示,所謂網絡紅人嘅KOL投資專家,並唔係全部都可信,除咗有個別涉無牌提供證券及期貨投資意見,更疑涉無牌集資進行投資活動,聽聞已有受害人曾向監管機構投訴,相關人事亦已被監管機構開晒「快勞」。不過道高一尺,魔高一丈,由於相關人事都識走法律罅,以至疑似斂財騙徒至今仍未被繩之於法。

早兩年虛擬貨幣開始流行,就有人透過社交平台及投資講座推銷虛擬貨幣掘礦機,其後「幣少爺」被警方拘捕,除因為去年底喺深水埗高調掟錢,涉嫌干犯擾亂公眾秩序被捕,其後再因為涉嫌串謀詐騙被商業罪案調查科拘捕,目前獲准保釋候查。案件正在調查中,但呢個「幣少爺」惹上官非肯定一身蟻。

勿輕信推銷者 盲目投資

事隔兩個月,又再有議員為另一班苦主發聲,指有另一網紅推銷,聲稱有高回報投資項目,疑墮入夾公仔機投資陷阱,所涉苦主逾百人,涉及金額超過3000萬元。

由實體夾公仔機發展至透過手機App遙控唔同夾公仔機獲得獎品,確有唔少玩家願意課金,令夾公仔機有利可圖。今次嘅一班苦主表示,喺投資過程中,一直無法得知自己所投資嘅夾公仔機實體置身何處,亦未能得知如何核實收益及分成安排。

證監會有可能調查

有苦主向營辦商查詢,對方亦未有回覆,重點係目前嘅回報不似預期。呢班苦主不約而同表示,係因為相信某投資網紅表示呢項投資一個月回報可達一成,加上之前跟網紅投資虛擬貨幣有斬獲,所以願意投資夾公仔機。

究意呢個網紅推銷夾公仔機有幾多着數,阿Man當然不得而知,但佢今次就有可能觸犯《證券及期貨條例》定義下嘅集體投資計劃,喺未有得到證監會認可豁免而進行推銷,就算警方暫時未立案介入,證監會都可能會開「快勞」調查。

其實阿Man一向強調自己盤數自己計,自己嘅錢要自己管好,進行任何投資前,都要清楚了解投資產品及項目,唔應該輕易相信推銷者所講嘅潛在回報而盲目投資。至於呢名網紅嘅發跡史,阿Man唔多講,皆因上網透過搜尋器,大家可以一目了然。

不過有一點阿Man認為值得留意,呢名網紅嘅發跡史亦不過係佢本人嘅片面之詞,而其所推銷嘅日本樓、虛擬貨幣掘礦機、雲端掘礦合約、SOLAR X太陽能項目,以及自動販賣機等等投資產品,登入其社交平台專頁,如入森林迷陣,投資產品五花八門,不過大多數都見負面消息頻傳。而其本人究竟有冇真金白銀投資呢啲項目,抑或只係做中介向公眾推銷,從而獲得佣金分成,真係無從稽考。

邊有「自己賺夠畀人賺」

無論掘礦機、雲端掘礦合約、自動販賣機又或夾公仔機都好,不外乎係一個斂財名目,一個吹噓帶有巨額回報嘅名目。

若然呢啲項目係有咁高回報,試問又何需打鑼打鼓喺社交平台招攬投資者,該名網紅倒不如自己獨食,賺個盤滿缽滿豈不更和味?呢個世界唔通真係有「自己賺夠畀人賺」咁大方嘅事?大家進行任何投資項目前,只要記得一句話,「邊有咁大隻蛤乸隨街跳」,自然唔會誤墮騙財陷阱。

麥狄文(徐狄怡.證監會持牌人 滙盈資產管理.董事總經理)

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads